ملک بھر میں جیو اور جنگ کیخلاف احتجاجی مظاہروں کا سلسلہ جاریبندش کا مطالبہ

بوریوالا ،تاندلیانوالہ، چمن، چوک بہادر ، حیدرآباد میں فوج اور آئی ایس آئی سے اظہار یکجہتی فوٹو : ایکسپریس / فائل

---

ملک بھر میں مختلف سیاسی، مذہبی وسماجی تنظیموں کی جانب سے فوج اور آئی ایس آئی کی حمایت جبکہ جنگ وجیو کیخلاف ریلیوں کا سلسلہ بدستور جاری ہے۔

ریلیوں کے شرکا جنگ وجیو کی بندش کیلئے سڑکوں پر سراپا احتجاج بنے رہے۔بورے والا میں تنظیم پاسداران پاکستان اوورسیز اور انجمن طلبا اسلام کے زیر اہتمام پاک فوج اور آئی ایس آئی سے اظہار یکجہتی کے لیے موٹر سائیکل ریلی نکالی گئی۔ پورا شہر پاک فوج زندہ آباد اور جیو کو بند کرو کے نعروں سے گونج اُٹھا۔ ریلی کے اختتام پر ذوالفقار احمد زلفی ڈوگر نے خطاب کرتے ہوئے کہا کہ جیو اور جنگ گروپ عرصہ دراز سے سی آئی اے اور ''را'' کے ایجنڈے کو کامیاب بنانے کے لیے پاک فوج اور آئی ایس آئی کا تشخص پامال کرنے کی مذموم کوششوں میں مصروف تھا۔ حامد میر پر حملہ کے بعد اس کا ایجنڈا بے نقاب ہو گیا۔

حکومت اس نیوز چینل کو فوری طور پر بند کروائے۔ کراچی میں تحریک انصاف کی جانب سے کلفٹن دو تلوار پر پاک فوج سے اظہار یکجہتی اور جیو وجنگ گروپ انتظامیہ کے خلاف احتجاجی مظاہرہ کیا گیا جس میں کارکنوں کی ایک بڑی تعداد نے شرکت کی۔ کارکنوں نے ہاتھوں میں پلے کارڈز اور بینرز اٹھا رکھے تھے، جن پر پاک فوج سے اظہار یکجہتی، جنگ وجیو اور میر شکیل الرحمن کے خلاف نعرے درج تھے۔ مظاہرین جنگ جیو مردہ باد اور میر شکیل کے خلاف نعرے بازی کررہے تھے۔ اس موقع پر مقررین نے کہا کہ پاک فوج اور آئی ایس آئی ہمارے ملک کے دفاع کی ضمانت ہیں۔

رحیم یارخان کے علاقے چوک بہادر میں پاک فوج اور آئی ایس آئی کے ساتھ اظہار یکجہتی کیلئے ریلی نکالی گئی جس میں ہر طبقہ عمر کے لوگوں نے شرکت کی۔ مقررین نے کہا کہ وزیراعظم سے مطالبہ کرتے ہیں کہ جیو اور جنگ کو مکمل طور پر بند کیا جائے۔ ٹنڈو محمد خان میں فلاحی تنظیم کے سینکڑوں کارکنوں نے مہران چوک سے بڑی ریلی نکالی جس میں کارکنوں کے علاوہ شہریوں کی بڑی تعداد نے بھی شرکت کی۔ شرکاء نے ہاتھوں میں بینرز اور پلے کارڈز اٹھا رکھے تھے جن پر جنگ اور جیو کے خلاف اور پاک فوج سے اظہار یکجہتی کے نعرے درج تھے۔