کراچی نوبیاہتا دلہن کیساتھ ساحل پر بیٹھا نوجوان ڈکیتی مزاحمت پر قتل

ملزمان لوٹ مار کے دوران عدنان کو قتل کرکے فرار ہو گئے

---

ڈاکوؤں نے نوبیاہتا جوڑے سے لوٹ مار کی واردات کے دوران فائرنگ کرکے اہلیہ کے ساتھ ساحل پر بیٹھے نوجوان کو قتل کردیا اور واردات کرکے فرار ہو گئے۔

پولیس کے مطابق ساحل تھانے کی حدود ساحل ایونیو کراسنگ خیابان بابر ڈیفنس فیز 8 کے علاقے میں ساحل کی پٹی پر فائرنگ کا واقعہ پیش آیا، جس میں مقتول کی شناخت 25 سالہ محمد عدنان ولد محمد اسحاق کے نام سے کی گئی، جو اپنی اہلیہ کے ساتھ ساحل کی پٹی پر بیٹھا ہوا تھا۔ مقتول کی 3 ماہ قبل ہی شادی ہوئی تھی۔

واقعے کے وقت محمد عدنان اپنی نوبیاہتا دلہن کے ساتھ سی ویو دو دریا کے قریب ریستوران میں کھانا کھانے آیا تھا، جس کے بعد دونوں ساحل پر بنی دیوار پر بیٹھے باتوں میں مصروف تھے کہ موٹر سائیکل سوار 2 ملزمان آئے اور لوٹ مار شروع کردی۔ ڈاکوؤں نے خاتون سے لوٹ مار کی تو عدنان مشتعل ہوگیا اور اس نے مزاحمت کی کوشش کی، جس پر ڈاکوؤں نے عدنان کو سر پر 2 گولیاں ماریں جو جان لیوا ثابت ہوئیں ۔

انویسٹی گیشن پولیس کے مطابق ڈاکو مقتول اور اس کی اہلیہ سے موبائل فون ، نقدی اور دیگر سامان لوٹ کر فرار ہو گئے۔ اطلاع ملنے پر پولیس پہنچی اور لاش کو ضابطے کی کارروائی کے لیے جناح اسپتال لایا گیا، جہاں اس کے مشتعل ورثا لاش کو بغیر پوسٹ مارٹم کرائے لے گئے۔

مقتول بلدیہ نیول کالونی کا رہائشی اور بلوچستان و کراچی میں ذاتی کاروبار کرتا تھا جب کہ اس کا آبائی تعلق بلوچستان کے علاقے قلات سے تھا ۔

ورثا کی جانب سے تدفین کے بعد واقعے کا مقدمہ درج کرانے کا کہا گیا ہے۔ پولیس نے مقتول کی گاڑی ساحل تھانے منتقل کردی اور جائے وقوع سے شواہد اکٹھے کرکے بیانات کی روشنی میں مختلف پہلوؤں کو پیش نظر رکھ کر واقعے کی تفتیش شروع کردی ہے۔