کوئٹہ:
حملے میں بچ جانے والے مسافروں کے تاثرات سامنے آئے ہیں ان میں قوال ندیم صابر بھی موجود تھے جو کوئٹہ جا رہے تھے۔
قوال ندیم صابر کا کہنا ہے کہ دہشت گردوں نے بس پر اندھا دھند فائرنگ کی، ہم قوالی کے فنکشن کیلئے جا رہے تھے اور اپنی منزل سے صرف آدھے گھنٹے دور تھے کہ یہ واقعہ پیش آیا۔
انہوں نے کہا کہ ہم قوال لوگ ہیں ہمارے کیا قصور ہے؟ ہم لوگوں کیلئے دعا کرتے ہیں ہمیں دہشت گردوں نے کس بات کی سزا دی؟ فائرنگ سے ہمارے تین بھائی شہید ہوگئے، ہمارے دیگر ساتھی زخمی ہوئے، ہمارا سارا سامان تباہ ہو گیا ہے، ہمارا تو کسی سے جھگڑا نہیں ہم تو اپنے بچوں کی روزی کما رہے ہیں۔
ایک مسافر نے کہا کہ ہم کراچی سے کوئٹہ جا رہے تھے کہ اچانک ہم پر حملہ ہوا، ہمارے ساتھ تقریباً تمام لوگ زخمی ہو گئے ہیں، ہمارے ساتھ بہت زیادتی ہوئی ہم غریب اور مزدور لوگ ہیں۔
ذرائع کا کہنا ہے کہ جب سے سیکیورٹی فورسز نے فتنہ الہندوستان کے دہشت گردوں کے خلاف کامیاب آپریشن شروع کیے ہیں اور ایف سی نے بارڈر سیل کر کے ان کی اسمگلنگ کی آمدنی بند کی ہے یہ بزدل دہشت گرد بوکھلاہٹ کا شکار ہو کر معصوم لوگوں کی جانوں کے درپے ہیں۔
ذرائع کا کہنا ہے کہ ہائی ویز پر مسافر بسوں پر دہشت گردانہ حملوں کی دو وجوہات میں سے ایک یہ کے یہ سافٹ ٹارگٹ ہیں، دوسری وجہ ایسے واقعات کرکے فوج اور ایف سی کو بارڈر اور آپریشن ایریا سے ہٹا کر ان جگہوں کی طرف لانا چاہتے ہیں تاکہ یہ دہشت گرد بارڈر اور آپریشن والے ایریا میں آسانی سے کام کرسکیں، انشاللہ فتنہ الہندوستان کے ان دہشت گردوں کا جلد قلع قمع کیا جائے گا۔
