لاہور:
پنجاب پولیس کو مظفرگڑھ کے کچے میں بڑی کامیابی مل گئی، کچہ ڈکیت گینگ نے چھینے گئے 100 جانوروں سمیت خود کو سرنڈر کردیا۔
ترجمان پنجاب پولیس کے مطابق ہتھیار ڈالنے والے ڈاکوؤں میں قلندر بوسن، اللہ نواز بوسن، شہزاد بوس، فیض رسول بوسن اور ساجد بوسن شامل ہیں، مظفرگڑھ پولیس کے ساتھ ایک ہفتہ شدید مقابلے، مزاحمت میں ناکامی کے بعد کچہ گینگ نے ہتھیار ڈالنے کا فیصلہ کیا۔
ترجمان کے مطابق ابتدائی طور گینگ کے 5 اہم کارندوں نے اسلحہ سمیت خود کو سرنڈر کیا ہے، گینگ ممبران نے جرائم کی دنیا سے توبہ بھی کرلی ہے۔
گینگ ممبران نے 4 کلاشنکوف، دو ریپیٹر بھی پولیس کے حوالے کردی ہیں، ہتھیار ڈالنے والے ڈاکوؤں پر دہشت گردی، قتل، اقدام قتل، ڈکیتی و رہزنی جیسے درجنوں مقدمات درج ہیں۔
ترجمان کے مطابق ڈی پی او مظفرگڑھ ڈاکٹر رضوان خان نے بازیاب 100 مویشی مڈ سونہارے شاہ میں اصل مالکان کے حوالے کر دیئے ہیں، آئی جی پنجاب ڈاکٹر عثمان انور نے کچہ کریمنلز کے خلاف شاندار کامیابی پر مظفرگڑھ پولیس کو شاباش دی ہے۔
