بھارت کی تمل فلم انڈسٹری کے سپر اسٹار اور ریسنگ کار کے دلدادہ اجیت کمار اٹلی میں ہونے والی GT4 یورپین سیریز کے دوران ایک خطرناک حادثے کا شکار ہو گئے۔
بھارتی میڈیا کے مطابق اجیت کمار اس خوفناک حادثے میں خوش قسمتی سے بال بال محفوظ رہے لیکن اس سے بھی حیران کن اداکار کا حادثے کے بعد پہلا ردعمل تھا۔
یہ حادثہ مسانو ورلڈ سرکٹ میں پیش آیا، جہاں اجیت کی ریسنگ کار ایک کھڑی ہوئی گاڑی سے ٹکرا گئی۔ اجیت کمار کار سے باہر آئے اور خود ریس کے مارشلز کے ساتھ کھڑے ہو کر ملبہ ہٹانے میں لگ گئے۔
GT4 یورپین سیریز کے آفیشل X (ٹوئٹر) اکاؤنٹ نے ویڈیو شیئر کی جس میں اجیت کو پُرسکون انداز میں پٹری سے ملبہ ہٹاتے دیکھا جا سکتا ہے۔
کیپشن میں لکھا گیا کہ ریس کے باہر، گاڑی کو نقصان، لیکن پھر بھی صفائی میں مدد کے لیے تیار۔ اجیت کمار کے لیے مکمل احترام!"
اس پوسٹ پر تبصرہ کرنے والوں نے بھی ان کی تعریف کرتے ہوئے کہا کہ یہ اس سیزن میں پہلا بڑا حادثہ ہے لیکن اجیت کمار اپنی جگہ چھوڑ کر مارشلز کے ساتھ مل کر صفائی میں لگ گئے۔ ایسا بہت کم ڈرائیور کرتے ہیں۔
سوشل میڈیا صارفین نے حادثے کے فوری بعد اداکار اجیت کمار کی بردباری، عاجزی اور کھیل کے لیے احترام کے جذبے کو سراہا۔
یاد رہے کہ اداکاری اجیت کمار موٹر اسپورٹس میں کوئی نیا نام نہیں۔ وہ 2003 میں فارمولا BMW ایشیا سیریز اور 2010 میں FIA فارمولا 2 چیمپئن شپ میں بھی حصہ لے چکے ہیں۔
رواں سال کے آغاز میں انہوں نے دبئی 24 آورز اینڈورینس ریس میں بھی شرکت کی تھی اور تیسری پوزیشن حاصل کی تھی۔
