پشاور:
خیبرپختونخوا کے وزیراعلیٰ علی امین گنڈاپور نے کہا ہے کہ سیلاب سے متاثرہ اضلاع کے نقصانات کی ابتدائی تفصیلات کی بنیاد پر جامع حکمت عملی تیار کی جا رہی ہے اور سیلاب متاثرین ہمارے اپنے ہیں ان کے لیے ہر حد تک جائیں گے۔
وزیراعلیٰ خیبرپختونخوا علی امین گنڈاپور نے کہا ہے کہ خیبر پختونخوا کے سیلاب سے متاثرہ اضلاع کے نقصانات کا سروے مکمل ہوچکا ہے اور ابتدائی تفصیلات کی بنیاد پر جامع حکمت عملی تیار کی جا رہی ہے۔
وزیراعلیٰ علی امین گنڈاپور نے سیلاب سے متاثرہ علاقوں میں امدادی سرگرمیوں کے حوالے سے کہا کہ خیبر پختونخوا حکومت کی جانب سے سیلاب متاثرہ اضلاع میں ریسکیو آپریشنز جاری ہیں، متاثرہ علاقوں میں ریلیف اور بحالی کے اقدامات بھی ساتھ چل رہے ہیں، متاثرہ علاقوں میں کھانے پینے سمیت رہائش کا بندوبست بھی کیا گیا ہے۔
انہوں نے کہا کہ ریسکیو آپریشنز اور امدادی سرگرمیوں کی براہ راست نگرانی کررہا ہوں، متاثرہ علاقوں سے روزانہ کی بنیاد پر امدادی سرگرمیوں کی رپورٹ دیکھ رہا ہوں، متاثرین کو باعزت روزگار، گھروں کی تعمیر نو اور دیگر ضروری سہولیات فراہم کی جائیں گی اور اس مقصد کے لیے ابتدائی مراحل میں فنڈز فراہم کیے گئے ہیں اور مزید فنڈز بھی مختص کیے جائیں گے۔
علی امین گنڈاپور نے کہا کہ خیبر پختونخوا کے سیلاب سے متاثرہ اضلاع کے نقصانات کا سروے مکمل ہوچکا ہے اور ابتدائی تفصیلات کی بنیاد پر جامع حکمت عملی تیار کی جا رہی ہے، حکومت اپنے تمام دستیاب وسائل بروئے کار لا رہے ہیں۔
انہوں نے کہا کہ تمام متعلقہ ادارے ہمارے ساتھ رابطے میں ہیں اور اقدامات میں بھرپور تعاون کر رہے ہیں، سیلاب متاثرین ہمارے اپنے ہیں ان کے لیے ہر حد تک جائیں گے۔
