تقریب کا احوال تم بھی حَد کرتے ہو

فرہاد جبریل نے اپنے پہلے مجموعہ کلام ’’تم بھی حَد کرتے ہو‘‘ سے منتخب اور پسندیدہ چند غزلیں پیش کر کے خوب داد سمیٹی۔

---

''تم بھی حد کرتے ہو'' یہ اپنے سے گلہ ہے نہ غیر سے شکوہ بلکہ یہ تو نوجوان شاعر فرہاد جبریل کی ذوقِ سلیم اور جدت فکری کا آئینہ دار پہلا مجموعہ کلام ہے۔ فرہاد جبریلؔ کا اصل نام بلال نذیر ہے۔ ان کے کلام میں مثبت سوچ کے ساتھ خود سے محبت، انسان سے محبت، کام سے محبت، عقیدے سے محبت، نظریات سے محبت، دھرتی سے محبت، اپنی محبت سے محبت اور پھر اِس محبتوں کے اظہار کا والہانہ اچھوتا انداز قاری کو متاثر کئے بغیر نہیں رہنے دیتا۔

اگر یہ کہا جائے کہ فرہاد اپنے کلام میں فصاحت، وسعت، معنویت، بلاغت، انفرادیت، جذباتیت، جازبیت کو بڑے خوبصورت انداز و مہارت اور نہایت دھیمے لہجے سے نمایاں رکھنے میں کامیاب ہوئے ہیں، تو بے جا نہ ہوگا۔ یہ تمام خصوصیات اُنہیں دورِ حاضر میں نئے اور نوجوان شعراء میں ممتاز کرتی نظر آرہی ہیں۔ دعاگو ہوں کہ فرہادؔ جبریل دنیا ِشعروادب میں کامیابی کا تاج سر پر سجائے اور ہمیشہ بلندیوں کو چھوتے نظر آئیں۔ اگر ''تم بھی حَد کرتے ہو'' کا مطالعہ کیا جائے تو انکی ہر غزل میں نیا پن اور چاشنی رنگ بدل بدل کر پہلے سے زیادہ لطف اندوز کرے گی اچھا شعر ڈھونڈنا نہیں پڑیگا ہر شعر ہی لطافت سے مالا مال ملے گا۔

گزشتہ ہفتے پاکستان ایسوسی ایشن دبئی کے زیرِ اہتمام فرہادؔ کے پہلے مجموعہ کلام ''تم بھی حَد کرتے ہو'' کی تقریب رونمائی کا انعقاد کیا گیا۔ دورانِ تقریب مقررین کے اظہار خیال پر فرہاد جبریل کے چہرے پر رقص کرتی مسکان، آنکھوں سے چھلکتا تبسم اِن کی بے انتہا خوشی، خود اعتمادی کی خوب ترجمانی کرتا رہا۔ مقرر اپنے اظہار خیال کے بعد اپنی نشست کی جانب بڑھتے تو فرہاد جبریل کھڑے ہو کر ہاتھوں میں ہاتھ تھام کر سینے پر سر رکھ کر ہدیہ شکرانہ پیش کرتے۔

نوجوان شاعرہ نیر نیناں نے اپنے ہمسفر فرہاد جبریل کو اُنکے پہلے مجموعہ کلام کی اشاعت پر مبارکباد پیش کی اور اپنے مضمون بعنوان ''فرہاد شیریں سخن'' میں اظہارِ خیال پیش کرتے ہوئے کہا کہ موجودہ دور کے جدت پسند شاعر فرہاد جبریل اپنے انوکھے تخلص کی طرح خیال بھی اچھوتا رکھتے ہیں۔ جو آنکھوں کی جھیل میں پیاس اور پانی کو اکٹھا رکھنے کا فن جانتے ہیں۔ شاعر سلمان خان نے فرہاد کے ساتھ گزرے یادگار اور دلچسپ لمحات کو سماعتوں کی نذر کیا اور کہا کہ فرہاد جبریل نے بڑے قلیل عرصے وہ مقام حاصل کیا ہے جو ہر شاعر کیلئے ممکن نہیں، انہوں نے اپنے اس مقام کو قائم بھی رکھا ہے جو بہت اہم ہے۔

سامعین ''تم بھی حَد کرتے ہو'' کے ناشرعلی زبیر کے مضمون بعنوان ''آج کا شاعر'' باذبانِ سلمان خان لطف اندوز ہوئے۔ جناب پروفیسر ڈاکٹر وحید الزمان طارق جو چند وجوہات کی بنا پر حاضر نہ ہوسکے، کی تحریر بھی پیش کی گئی انہوں کا کہنا تھا کہ صاحبِ کتاب سادگی شعار ہے، کردار میں اخلاص میں زبان میں رہن سہن میں اور گفتگو میں سادگی کو پسند کرتا ہے۔ میں پہلے مجموعہ کلام ''تم بھی حد کرتے ہو'' کی اشاعت اور رونمائی پر دل سے مبارکباد پیش کرتا ہوں۔

محترم محمد ظہیر بدر کا کہنا تھا کہ بلال (فرہاد جبریل) کے ہاں خیالات اچھوتے سانچے میں ڈھلتے ہیں۔ اپنی شاعری میں خیال سے سوال کرتا ہے اور سوال سے مکالمہ کرکے ہمیں آگاہ کرتا ہے، جبکہ جواب تو سوال سے بھی زیادہ عجیب ہوتا ہے۔ کہیں بھی دکھلاوے کا گمان نہیں ہوتا۔ جو اِس کے خوب مطالعے کی دلیل ہے۔ پوفیسر پیر آغا کیلاش نے فرہاد اور اُس کی شاعری کے حوالے سے اپنے خیالات کا اظہار کرتے ہوئے کہا کہ فرہاد کا تعلق پاکستان کے اُس حصے سے ہے جہاں مہذب، عشق اور عام زندگی میں کوئی فرق نہیں سمجھا جاتا اور یہی شاہکار اس کی شاعری میں موجود ہے۔ شاعری میں کوئی بناوٹ نہیں، نعرے بازی نہیں بلکہ زندگی کو سینے سے لگانا ہی فریاد کی شاعری ہے۔

وہ مرحلہ آپہنچا جسکے لئے اِس خوبصورت محفل کا انعقاد کیا گیا تھا۔ تالیوں کی گونج میں فرہادکے پہلے مجموعہ کلام ''تم بھی حَد کرتے ہو'' کی رونمائی عمل میں لائی گئی۔ اس لمحات کو یادگار بنانے میں ظہورالسلام جاوید، نیر نیناں، یعقوب تصور، ڈاکٹر عاصم واسطی، طارق رحمن، طاہر زیدی، محمد ظہیر بدر، پیرآغا کیلاش، سلمان جاذب، سلمان احمد خان، بی اے شاکر، عبدالطیف نے حصہ لیا۔

نامور شاعر ڈاکٹر صباحت عاصم واسطی نے اپنے اظہارِ خیال میں کہا کہ جبری شاعری میں لفظ اور خوبصورت لفظ گریز کرتے ہیں۔ مگر فرہاد جبریل نے اپنے آپ کو لفظوں کے سپرد کرکے لفظوں سے پذیرائی حاصل کرنے کا گُر بڑے ہی قلیل مدت میں سیکھ لیا ہے کہ اب الفاظ اور خوبصورت الفاظ فرہاد کی تلاش میں گھومتے ہیں۔ یہ اب لفظ اور معنی کے درمیان سے ہٹ چکا ہے۔ معروف شاعر و ادیب یعقوب تصور نے فرہاد جبریل کی کتاب اور شاعری کے حوالے سے لکھی اپنی تحریربعنوان''تم نے حد کر دی ہے'' پیش کرتے ہوئے کہا کہ اسم فرہاد جبریل شہر لغت میں مرکب ہوا ان دو الفاظ سے جن میں اک کا تعلق تو دنیا سے ہے، دوسرے کا تعلق ہے عرش معلی کی اقلیم سے، اک علمدار جذباتِ آتش فشاں، احساسات سبک کا حسین آئینہ، داستانِ ازل تا ابد عرش سے فرش تک حسن نظارہ زندگی کا بیاک، ایک جسم زمیں ایک روح الامیں۔

صاحبِ کتاب فرہاد جبریل کو ناظمِ محفل طارق رحمن نے مائیک پر مدوع کیا تو انہوں نے سب پہلے طاہر زیدی اور طارق رحمن کا شکریہ ادا کیا جنہوں نے پاکستان ایسوسی ایشن کی ادبی کمیٹی کے زیرِ اہتمام ایک خوبصورت محفل کا انعقاد کیا۔ مقررین، نیر نیناں، ظہیربدر، پیر کیلاش، یعقوب تصور، ظہوالاسلام جاوید، طارق رحمن، ڈاکٹر واسطی اور تمام حاضرین سے بھی اظہار تشکر کیا جن کے محبت بھرے اظہارِ خیال اور شرکت نے محفل میں خوب رنگ بھر کر اِسے انکی زندگی کا یادگار لمحہ بنا دیا۔ فرہاد نے کہا امارات کی ادبی حلقوں میں مجھے متعارف کرانے کا سہرا سلمان بھائی کے سر ہے جو میرے لئے احسانِ خاص ہے۔ یہاں میرے اس جاری ادبی سفر میں قدم قدم پر ظہورالسلام جاوید صاحب اور ڈاکٹر واسطی صاحب کی رہنمائی میرے ساتھ ساتھ ہیں جو میرے لئے باعثِ اعزاز و مسرت ہے کہ میں ان بڑی شخصیات سے بہت کچھ سیکھ رہا ہوں۔ میری شریک حیات نیر نیناں نے بھی ہر قدم پر میرا ساتھ دیا ہے حوصلہ بڑھایا ہے۔ انہوں نے بڑی سادگی اور عاجزی سے اپنی زندگی کی کڑوی اورمیٹھی یادوں کو بھی سماعتوں کی نذر کیا۔ انہوں کہا میں نے اللہ سے ہمیشہ جیت مانگی ہے اور میں الحمداللہ کبھی ہارتا نہیں۔ فرہاد جبریل نے اپنے پہلے مجموعہ کلام ''تم بھی حَد کرتے ہو'' سے منتخب اور پسندیدہ چند غزلیںپیش کر کے خوب داد سمیٹی۔

اختتامیہ کلمات پیش کرتے ہوئے طاہر حسنین زیدی نے فرہاد جبریل کو پہلے مجموعہ کلام کی اشاعت پر مبارکباد دی اور تمام شرکاء کا شکریہ ادا کیا۔ تقریب میں عبدالطیف، یعقوب عنقا، سلمان جاذب، آصف رشید اسجد، مسرت شاہین مسرت، منصور انعام، اکرام اکرم، عتیق الرحمن، عادل فہیم کے علاوہ ادب کا ذوق رکھنے والوں کی کثیر تعداد نے بھی شرکت کی۔

نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں ہے۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 سے 800 الفاظ پر مشتمل تحریر اپنی تصویر، مکمل نام، فون نمبر ، فیس بک اور ٹویٹر آئی ڈیز اوراپنے مختصر مگر جامع تعارف کے ساتھ [email protected] پر ای میل کریں۔ بلاگ کے ساتھ تصاویر اورویڈیو لنکس