نیویارک کی اسٹریٹ لیجنڈ باکسر محمد علی کے نام سے منسوب

نیویارک میں میڈیسن اسکوائر گارڈن کی اسٹریٹ کو محمد علی کے نام سے منسوب کیا گیا ہے۔ فوٹو؛ فائل

---

نیویارک کے میئر نے شہر کی ایک اسٹریٹ کو عظیم باکسر محمد علی کے نام سے منسوب کردیا گیا۔

لیجنڈ باکسر محمد علی کے انتقال پر جہاں ان کے مداح سوگوار ہیں وہیں دنیا بھر میں عظیم باکسر کو بھی زبردست خراج عقیدت پیش کرنے کا سلسلہ جاری ہے۔ نیویارک میں میڈیسن اسکوائر گارڈن کی ایک اسٹریٹ کو عظیم باکسر محمد علی کے نام سے منسوب کردیا گیا ہے، نیویارک کے میئر بل ڈی بلاسیو نے میڈیسن اسکوائر گارڈن سے متصل سڑک کو عظیم لیجنڈ باکسر سے منصوب کرتے ہوئے کہا کہ ہم آج محمد علی کو خراج تحسین پیش کرتے ہیں اور اس سڑک کو ان کے نام سے منسوب کرتے ہیں کیونکہ وہ اس اعزاز کے حقدار ہیں۔

باکسر محمد علی نے میڈیسن اسکوائر گارڈن میں 8 مرتبہ فائٹ کی جب کہ یہاں ہونے والی تاریخی ہیوی فائٹ 1971 میں اس وقت کے عظیم باکسر جو فرازیر سے ہوئی تھی جس میں محمد علی کو شکست کا سامنا کرنا پڑا تھا تاہم نیویارک کی اسٹریٹ کو عارضی طور پر محمد علی سے منسوب کیا گیا ہے جس کو کونسل سے منظوری اور میئر کے سائن کے بعد مستقل طور پر لیجنڈ کے نام سے منصوب کردیا جائے گا۔

واضح رہے کہ شہرہ آفاق باکسر محمد علی کلے مختصر علالت کے بعد 4 جون کو انتقال کرگئے تھے جب کہ ان کے جسد خاکی کو امریکی ریاست کینٹکی میں ان کے آبائی علاقے لوئی ول پہنچا دیا گیا ہے جہاں جمعہ کو ان کی نماز جنازہ ادا کی جائے گی۔