دورہ انگلینڈ قومی کرکٹرز آج ایکشن میں نظر آئیں گے

سمرسٹ کیخلاف سہ روزہ میچ میں لارڈز ٹیسٹ کی ممکنہ بیٹنگ لائن آزمائی جائے گی۔ فوٹو: فائل

---

پاکستانی کرکٹ ٹیم دورئہ انگلینڈکا آغاز اتوار کو سہ روزہ میچ سے کرے گی، پلیئرز ٹاؤنٹن میں سمرسٹ کیخلاف ایکشن میں نظر آئیں گے، کاکول اکیڈمی میں سخت ٹریننگ سے حاصل فٹنس کی جانچ ہوگی، کنڈیشننگ کیمپ میں نکھاری جانے والی صلاحیتیں پرکھنے کا بھی موقع ملے گا۔

تفصیلات کے مطابق طویل دورہ انگلینڈ کے لیے پاکستان کی تیاریوں کا سلسلہ بھی طویل تھا، کرکٹرز نے کاکول اکیڈمی میں آرمی ٹرینرز کی رہنمائی میں فٹنس میں بہتری لانے کیلیے کام کیا، بعد ازاں لاہور میں مختصر اسکلز کیمپ میں بھی شارٹ لسٹ کیے گئے کھلاڑی شریک ہوئے، قومی اسکواڈ کو قبل از وقت روانہ کرکے ہیمپشائر میں 10روزہ کنڈیشننگ کیمپ کا اہتمام کیا گیا تھا، خراب موسم کی وجہ سے آؤٹ ڈور ٹریننگ اور کرکٹرز کا باہمی پریکٹس میچ متاثر ہوا تاہم کسی نہ کسی طور سرگرمیاں جاری رکھنے کی کوشش ہوتی رہی، کیمپ مکمل ہونے کے بعد ٹاؤنٹن میں بھی بیٹنگ، بولنگ اور فیلڈنگ کی مشقوں کا سلسلہ جاری رہا۔

ٹیسٹ سیریز کی تیاری کیلیے پہلا 3روزہ وارم اپ میچ اتوار کو شروع ہوگا، قومی کرکٹرز کو سمرسٹ کاؤنٹی کےخلاف فٹنس کی جانچ کا موقع ملے گا، کنڈیشننگ کیمپ میں کی گئی مشقوں نے صلاحیتوں کو کس حد تک نکھارا اس کا بھی اندازہ ہوجائے گا، امکان یہی ہے کہ ٹیم مینجمنٹ کم و بیش وہی بیٹنگ آرڈر آزمائے گی جو انگلینڈ کیخلاف لارڈز میں پہلے ٹیسٹ کیلیے موزوں خیال کیا جارہا ہے۔