آئٹم سانگ آج دھوم مچانے کے لیے تیار نئی فلم میں پھر مختلف نظر آؤں گی کرینہ

اپنے کیریئر کے دوران شائد سب سے زیادہ رسک لیے، کرینہ کپور۔ فوٹو اے ایف پی / فائل

---

بالی وڈ اداکارہ کرینہ کپور نے کہا ہے کہ سال 2012 کے دوران ہر طرح کا کردار نبھایا ہے ،نئے کرداروں کے لیے رسک لیا جاتا ہے اور اس طرح کا رسک میں آئندہ بھی لیتی رہوں گی۔

اداکارہ کا کہنا ہے کہ ہر فلم میں مختلف نظر آنے کی خاطر اپنے ہر نئے کردار پر بڑی محنت کی ہے۔ انھوں نے کہا کہ آج ریلیز ہونے والی فلم''دبنگ ٹو'' کے آئٹم نمبر میں مختلف نظر آئوں گی۔ انھوں نے کہا کہ رواں سال شادی اور فلموں کی کامیابی سمیت متعدد خوشیاں نصیب ہوئی ہیں،یہ سال بے شمار خوشیاں لایا۔ نئی فلم ''دبنگ ٹو''کے لیے آئٹم سانگ بھی دھوم مچانے کے لیے تیار ہے۔ انٹرویو کے دوران انھوں نے بتایا کہ 2000ء میں فلم ''رفیوجی ''سے لے کر اب تک مختلف کردار نبھائے اور ہر کردار کو مختلف انداز میں کرکے شائقین کے دل جیتے ہیں۔ مداحوں کی محبت نے ہی مجھے اتنا زیادہ کام کرنے پر مجبور کیا ہے اور میں آج بھی تازہ دم نئی فلموں کے لیے کام کررہی ہوں۔کرینہ کپور کا کہنا ہے کہ ہر نئے کردار کو سائن کرتے وقت کچھ رسک بھی لینا پڑتا ہے ہر نئے کام میں رسک تو پھر ہوتا ہی ہے اور میں نے اپنے کیریئر کے دوران شائد سب سے زیادہ رسک لیے۔

32سالہ اداکارہ کرینہ کپور کا کہنا ہے کہ نئی فلم ''دبنگ ٹو'' کے لیے آئٹم سانگ بھی پرستاروں کی خوشی کے لیے کیا ۔اس کے بعد اب 2013ء میں ریلیز ہونے والی نئی فلم میں خاتون جرنلسٹ کا کردار نبھا رہی ہوں، اس سے قبل بھی ٹی وی رپورٹر کا کردار نبھایا ہے تاہم اس فلم میں لیڈنگ لیڈی رول میں جلوہ گر ہوں گی۔ کرینہ کپور نے کہا ہے کہ شادی کے بعد اپنی روٹین کی شوبز سرگرمیاں جاری رکھے ہوئے ہوں، سیف علی خان کے ساتھ بہت خوش ہوں۔ 21ستمبر 1980ء کو کپور خاندان کے اہم اداکار رندھیر کپور اور ببیتا کے گھر میں پیدا ہونے والی کرینہ کو پیار سے بے بو بھی کہا جاتا ہے۔

کرینہ بھارت کے نامور فلمساز و اداکار راج کپور کی پوتی ہیں، رشی کپور ان کے چچا ہیں،کرشمہ کپور بڑی بہن ہیں۔کرینہ کا کہنا ہے کہ وہ بچپن سے ہی فلموں کی دلدادہ رہی ہیں، نرگس اور مینا کماری کی فلمیں بڑے شوق سے دیکھیں اور ان کی زبردست مداح بھی ہیں۔ اداکارہ نے گریجوایشن کے بعد کامرس کے مضمون رکھ لیا اور دو سال پڑھنے کے بعد لاء کالج میں قانون کی تعلیم حاصل کرنے لگیں اور ایک سال لاء پڑھنے کے بعد فیصلہ کیا کہ اداکاری کرنے کے منصوبے پر عمل کرنا ضروری ہے۔ کرینہ کپور نے اندھیری ایکٹنگ انسٹی ٹیوٹ میں داخلہ لے کر اداکاری سیکھنا شروع کر دی۔



واضح رہے کہ اداکارہ کی 2000 ء میں پہلی فلم ''رفیوجی''ریلیز ہوئی جس میں انھوں نے اپنی بہترین پرفارمنس پر فلم فیئر ایوارڈ جیتا۔ 2001ء میں فلم ''مجھے کچھ کہنا ہے''، ''یادیں''، ''اجنبی''، ''اشوکا''، ''کبھی خوشی کبھی غم'' 2002ء میں فلم ''مجھ سے دوستی کروگی''،''جینا صرف میرے لیے ''2003ء میں فلم ''تلاش''،''میں پریم کی دیوانی ہوں''،''ایل اوسی کارگل'' 2004ء میں ''چمیلی''، ''یوو''، ''فدا''، ''اعتراض''، ''ہلچل'' 2005ء میں فلم ''بے وفا''، ''کیونکہ''،''دوستی ''جب کہ 2006ء میں فلم ''36چائنا ٹائون''، ''چپکے چپکے''، ''اومکارا'' اور فلم ''ڈان ''میں پرفارم کیا۔ 2007ء کے دوران فلم ''کیا لو اسٹوری ہے''، ''جب وی میٹ''میں کام کیا ،2008ء میں فلم ''ہلہ بول''، ''تلاش''،''روڈ سائیڈ رومیو''اور فلم ''گول مال ریٹرنز'' میں اداکاری کے جوہر دکھائے۔ 2009ء میں فلم ''لک بائی چانس''، ''بلیو''، ''کمبخت عشق''ا ور فلم ''تھری ایڈیٹس'' میں فن کا جادو جگایا۔ 2010ء میں فلم ''ملیں گے ملیں گے''،''وی آر فیملی '' اور ''گول مال تھری'' میں صلاحیتوں کا اظہار کیا۔2011ء میں فلم ''باڈی گارڈ''، ''را۔ون'' میں عمدہ کام کرکے داد پائی، 2012ء میں اداکارہ کرینہ کپور نے فلم ''اک میں اور اک تو'' ،''رائوڈی راٹھور''، ''ہیروئن''، ''ایجنٹ ونود''اور ''تلاش ''فلم میں جلوہ گرہوئیں۔ اداکارہ کرینہ کی دو آنے والی فلموں میں ایک ''دبنگ ٹو ''ہے جس میں ان کی مختصر آمد ہوگی۔ اس فلم کے لیے آئٹم سانگ پرفارم کیا ہے۔

اداکارہ کا کہنا ہے کہ ان کے اس سانگ پر پرفارمنس سے ایک بار پھر دھوم مچا دوں گی جب کہ پرکاش جھا کی فلم ''ستیہ گرہ ''میں ایک ٹی وی رپورٹر کا کردار نبھارہی ہیں۔ اس تھرلر ایکشن ،پولیٹیکل فلم کا آئیڈیا منفرد ہے اور کرینہ کا اس میں نہایت اہم کردار ہوگا ۔یہ فلم اگست 2013ء کو ریلیز کی جائے گی۔ ادھر سال 2012ء کے دوران بالی وڈاداکارہ کرینہ کپور سلور اسکرین پر چھائی رہیں۔ کرینہ کپورکی کامیابی سے ثابت ہوا کہ بالی وڈ فلموں کی ہیروئن محض شوپیس نہیں ہوتیں بلکہ فلموں کی کامیابی کے لیے ان کا کردار بہت اہم ہوتا ہے۔ اداکارہ کرینہ کپور اس سال اپنی تین فلموں کے سبب باکس آفس کی ملکہ کہلانے کی حقدار رہیں۔ ''ایک میں اور ایک تو''، ''تلاش'' اور ''ہیروئن'' ریلیز ہوئیں۔ فلم ''تلاش '' نے اس سال بڑا منافع کمایا۔یہ فلم کرینہ کی کامیاب ترین فلموں کی فہرست میں ایک اور اضافہ ثابت ہوئی۔

دوسری جانب اس سال وہ سیف علی خان کے ساتھ شادی کی وجہ سے بھی خبروں میں رہیں اور تقریباً سارا سال ہی ان کے چرچے ہوتے رہے۔ دریں اثناء کرینہ کپور نے اپنے کزن رنبیر کپور کے بارے میں کہا ہے کہ عنقریب وہ ایوارڈز حاصل کرنے کے معاملے میں ان پر سبقت لے جائے گا۔ میڈیا سے گفتگو کرتے ہوئے ان کا کہنا تھا کہ جس روز ایسا ہوگیا وہ ان کے لیے ایک اہم دن ہوگا۔ انھوں نے کہا کہ وہ جب بھی فلم فیئر ایوارڈ حاصل کرنے کے بارے میں سوچتی تھیں تو پروگرام بناتی تھیں کہ ایوارڈ لیتے وقت کیسی تقریر کروں گی۔ اپنے والد اور والدہ کا شکریہ ادا کروں گی جن کی بدولت انھیں یہ مقام حاصل ہوا لیکن جب تقریب میں اسٹیج پر پہنچتی تھی تو سب کچھ بھول جایا کرتی تھی اور اب یوں محسوس ہو تا ہے کہ فلم فیئر کی ٹرافی ان کا قبر تک پیچھا کرے گی ابھی تو صرف چھ ٹرافیاں ملی ہیں آئندہ جانے اور کتنی وصول کرنی پڑیں۔

32سالہ کرینہ کا کہنا تھا کہ اب باہر سے نہیں بلکہ میرے اپنے خاندان میں ان کا ولن پیدا ہو گیا ہے، وہ ہے رنبیر کپور جو مجھے ٹرافیوں کے حصول کے معاملے میں شکست دے دے گا۔ یہی نہیں بلکہ لگتا ہے کہ وہ تو دادا راج کپور کا ریکارڈ بھی توڑ دے گا۔بتایا گیا ہے کہ کرینہ کپور 2013ء میں ریلیز ہونے والی فلم میں کرینہ کپور نے خاتون صحافی کا کردار نبھانے کے لیے ورکنگ جرنلسٹس کے کام کو قریب سے دیکھا ہے۔ اداکارہ کا کہنا ہے کہ نئی فلم میں پیشہ وارانہ صلاحیتوں کا بھرپور اظہار کیا جائے گا۔