روشنیوں کے جھرمٹ میں کامن ویلتھ گیمز کا آغاز ہو گیا

افتتاحی تقریب میں پاکستانی دستے کا بھی مارچ پاسٹ، قومی پرچم عثمان امجدنے تھاما،ہاکی ٹیم آج ویلز کا سامنا کرے گی۔

Sports Reporter April 05, 2018

افتتاحی تقریب میں پاکستانی دستے کا بھی مارچ پاسٹ، قومی پرچم عثمان امجدنے تھاما،ہاکی ٹیم آج ویلز کا سامنا کرے گی۔ فوٹو: اےا یف پی

روشنیوں کے جھرمٹ میں 21 ویں کامن ویلتھ گیمز کا آغاز ہو گیا۔

21 ویں کامن ویلتھ گیمز کی افتتاحی تقریب میٹریکون اسٹیڈیم گولڈ کوسٹ میں منعقد ہوئی جہاں 35 ہزار کے قریب تماشائیوں کی موجودگی میں فاکس ویگن میں لائی گئی مشعل کو آسٹریلیا کے مختلف لیجنڈز کھلاڑیوں نے گراؤنڈ کا چکر لگا کر مقررہ مقام پرروشن کیا جس کے بعد گیمزکے باقاعدہ آغازکااعلان کیا گیا اس موقع پرآسٹریلیا کا قومی ترانہ پڑھا گیا اور کھلاڑیوں سے روایتی حلف لیا گیا۔

مارچ پاسٹ میں سب سے پہلے اسکاٹ لینڈ جبکہ آخر میں پانچویں بار کامن ویلتھ گیمز کی میزبانی کرنے والے آسٹریلیا کا دستہ اسٹیڈیم میں داخل ہوا پاکستان کے جانب سے ویٹ لفٹر عثمان امجد راٹھور قومی پرچم کے ساتھ چیف ڈی مشن جنرل مزّمل حسین ،کھلاڑیوں اورآفیشلز کے ہمراہ گراؤنڈ میں داخل ہوئے۔

تقریب میں برطانیہ کے پرنس چارلس اور ان کی اہلیہ کومیلا نے خصوصی شرکت کی افتتاحی تقریب ہرلحاظ سے قابل دیدتھی جہاں آتشبازی اور لیزر شو نے شائقین کو اپنے سحرمیں جکڑ لیا وہیں موسیقی پر فنکاروں کے دلفریب ثقافتی رقص اور دیوہیکل شارک کے ماڈل کی اسٹیڈیم آمد پر حاضرین نے دل کھول کے داد دی۔

اس موقع پر گیمز آرگنائزنگ کمیٹی کے چیئرمین پیٹر بائیٹے نے تمام ممالک کی ٹیموں کوخوش آمدید کہتے ہوئے سب کا خیرمقدم کیاان گیمز کی میزبانی کوآسٹریلیا کااہم معرکہ قرار دیا جمعرات سے ساڑھے 6 ہزار سے زائد مرد و خواتین کھلاڑی مختلف کھیلوں میں 275میڈلزکے حصول کیلیے قسمت آزمائی کاآغازکریں گے۔

پاکستان کے بدھ 5 اپریل کوکھیلے جانے والے مقابلوں میں ٹیبل ٹینس مکس ٹیم ایونٹ میں صبح 9 پاکستان کا مقابلہ اسکاٹ لینڈ جبکہ شام 7 بجے بھارت سے ہوگا، باکسنگ میں گل زیب ولیہم کے مدمقابل ہوں گے رات ساڑھے7 بجے پاکستان ہاکی ٹیم ویلز سے مقابلہ کرے گی جبکہ اسکواش میں طیب اسلم کا مقابلہ نویلی سے جبکہ فرحان ظفر کا جوزف سے ہوگا۔

خواتین ایونٹ میں مدینہ ظفراور فائزہ ظفرایکشن میں ہونگی، سوئمنگ میں 100 میٹر بیک اسٹروک میںحسیب طارق جبکہ ویٹ لفٹنگ ایونٹ مین عبداللہ غفور 56 کے جی اور طلحہ طالب 62 کے جی کے مقابلے میں حصہ لیں گے۔