سامان چرانے کی ویڈیو لیک ہونے پراسپین کی حکمراں جماعت کی رہنما پارٹی عہدے سے مستعفیٰ

کرسٹینا نے شاپنگ مال سے بڑھتی عمر کے اثرات کو کم کرنے والی کاسمیٹک کریم چرائی تھی۔

ویب ڈیسک April 25, 2018

میڈرڈ کمیونیٹی کی صدر پر اس سے قبل جعلی ڈگری کا الزام بھی لگا تھا۔ فوٹو : فائل

BRUSSELS: ہسپانوی سیاست دان اور میڈرڈ کمیونیٹی کی صدر کرسٹینا سیفیونٹس نے شاپنگ مال میں چوری کی اپنی ویڈیو منظر عام پر آنے کے بعد عہدے سے استعفیٰ دے دیا ہے۔

برطانوی نشریاتی ادارے کے مطابق اسپین کی میڈرڈ کمیونیٹی کی 53 سالہ صدر کرسٹینا نے 2011 کی ایک ویڈیو لیک ہونے پر عوامی دباؤ کے پیش نظر اپنے عہدے سے استعفیٰ دے دیا ہے۔ انہوں نے شاپنگ مال سے بڑھتی عمر کے اثرات کو کم کرنے والی دو کاسمیٹک کریم چرائی تھیں۔

کرسٹینا اسپین کی حکمراں جماعت پارٹیڈو پاپولر کی اہم رہنما ہیں جو گزشتہ ہفتے اپنی جعلی ڈگری کے خبروں کی وجہ سے مشکلات کا شکار رہی تھیں جس کے باعث انہیں اپنی جماعت اور عوام کی جانب سے مستعفی ہونے کے لیے شدید دباؤ کا سامنا تھا تاہم شاپنگ مال میں چوری کی ویڈیو منظر عام پر آنے کے بعد کرسٹینا نے اپنا استعفیٰ وزیراعظم ماریانو راجوئے کو پیش کردیا ہے۔