اقوام متحدہ کا غزہ میں جنگی جرائم کی تحقیقات کیلیے وفد بھیجنے کا فیصلہ

قرارداد کے حق میں 29 اراکین نے ووٹ دیے جب کے امریکا اور آسٹریلیا نے مخالفت کی

ویب ڈیسک May 19, 2018

امریکا اور آسٹریلیا نے قرار داد کی مخالفت کی۔ فوٹو : اقوام متحدہ

اقوام متحدہ کی انسانی حقوق کونسل نے فلسطین میں اسرائیلی جارحیت اور جنگی جرائم میں ملوث ہونے کی تحقیقات کے لیے فوری طور پر عالمی ماہرین پر مشتمل وفد کو غزہ بھیجنے کا فیصلہ کیا ہے۔

بین الاقوامی خبر رساں ادارے کے مطابق اقوام متحدہ کی انسانی حقوق کی کونسل نے جنگی جرائم کے عالمی تحقیق کاروں پر مشتمل ایک وفد کو غزہ بھیجنے کے حق میں ووٹ دے دیا ہے جس کے بعد اقوام متحدہ فوری طور ماہرین کے ایک وفد کو غزہ بھیجے گی جو اسرائیلی فوج کی جانب سے فلسطینیوں کے قتل عام پر تحقیقات کرے گی۔

یہ پڑھیں: غزہ میں ضرورت سے زیادہ طاقت کا استعمال کیا گیا، اقوام متحدہ

اقوام متحدہ کی عالمی کونسل کی جانب سے جنگی جرائم کی تحقیقات کے لیے ماہرین کو غزہ بھیجنے کے لیے قرارداد کی 29 اراکین نے حمایت کی جب کہ امریکا اور آسٹریلیا نے مخالفت کی اور 14 ممالک نے ووٹنگ میں حصہ نہیں لیا۔ غزہ جانے والا وفد ایک ماہ کے اندر اپنی تحقیقاتی رپورٹ جمع کرانے کا پابند ہو گا جس کی روشنی میں اقوام متحدہ راست قدم اُٹھائے گی۔

The 28th Special Session of the Council "Violations of international law in the context of large-scale civilian protests in the #OPT, including East Jerusalem" has concluded.
The draft Resolution has been adopted by 29 votes in favor, 2 against, 14 abstentions. pic.twitter.com/C1MOS6aTPn
— UN Human Rights Council (@UN_HRC) May 18, 2018

واضح رہے کہ فلسطین میں امریکی سفارت خانے کی تل ابیب سے یروشلم منتقلی کے موقع پر اسرائیلی فوجوں نے ظلم کی انتہا کرتے ہوئے فلسطینی مظاہرین کو براہ راست گولیوں کا نشانہ بنایا اور خواتین، بچوں، بزرگوں اور معذور افراد پر ظلم و تشدد کا نشانہ بنایا جس کے نتیجے میں 60 سے زائد فلسطین شہید اور تین ہزار سے زائد زخمی ہو گئے تھے۔