سوئیڈش اسٹرائیکر زلاٹن ابراہیمووچ کے کیریئر میں 500 گول مکمل

ٹورنٹو کلب کو اس لیے یاد رکھوں گا کہ ان کیخلاف میں اپنے کیریئر کا 500 واں گول بنانے میں کامیاب رہا، سوئیڈش اسٹرائیکر۔ فوٹو: سوشل میڈیا

---

سوئیڈش اسٹرائیکر زلاٹن ابراہیمووچ نے کیریئر میں 500 گول مکمل کرلیے، انھوں نے یہ سنگ میل گذشتہ دن امریکن کلب لاس اینجلس گلیکسی کی جانب سے ایف سی ٹورنٹو کیخلاف گول داغ کر عبور کیا۔

زلاٹن 500 گول بنانے والے سردست دنیا کے تیسرے متحرک پلیئر ہیں، ان کے علاوہ لیونل میسی اور کرسٹیانو رونالڈو بھی کیریئر میں 500 سے زائد گول بناچکے ہیں۔

میچ کے بعد سوشل میڈیا پر جاری کردہ بیان میں زلاٹن نے کہا کہ بلاشبہ میچ ہارجانا اچھا نہیں ہے لیکن میں ٹورنٹو کلب کو اس لیے یاد رکھوں گا کہ ان کیخلاف میں اپنے کیریئر کا 500 واں گول بنانے میں کامیاب رہا۔

اپنے بھرپور کیریئر میں زلاٹن اب تک پی ایس جی کیلیے 156، انٹرمیلان کیلیے 66، اے سی میلان کی جانب سے 56، اجیکس کیلیے 48، مانچسٹریونائیٹڈ کیلیے 29، یوونٹس کیلیے 26، بارسلونا کی جانب سے 22، مالمو کیلیے 18 اور سوئیڈش ٹیم کیلیے 62 بار گیند کو جال کی راہ دکھاچکے ہیں، لاس اینجلس گلیکسی کیلیے وہ اب تک 22 میچز میں 17 گول اسکور کرچکے۔