’ ٹھگ آف ہندوستان‘ کی ریلیز خطرے میں پڑ گئی

شکایت میں فلم کانام تبدیل کرنے اور عامر خان کے نام سے فرنگی ہٹانے کا مطالبہ کیاگیا ہے فوٹوفائل

---

بالی ووڈ کے مسٹرپرفیکشنسٹ عامر خان کی فلم'ٹھگ آف ہندوستان' ریلیز سے پہلے ہی مشکل کا شکار ہوگئی۔

شائقین بالی ووڈ کی مہنگی ترین فلم 'ٹھگ آف ہندوستان' کا انتظار بے چینی سے کررہے ہیں تاہم عامر خان کی فلم ریلیز سے قبل ہی مشکل کا شکار ہوگئی۔ بھارتی ریاست اتر پردیش کے شہر جون پور کے شہری ہنس راج چوہدری نے فلم کے پروڈیوسر، ہدایت کار اور عامر خان کے خلاف شکایت درج کرائی ہے۔

شکایت کنندہ اور نشاد (ملاح) سوسائٹی نے فلم کا نام تبدیل کرنے اور فلم میں عامر خان کے نام 'فرنگی ملاح' سے فرنگی ہٹانے کا مطالبہ کیا ہے، ان کا کہنا ہے کہ فلم کی شہرت میں اضافے اور زیادہ پیسے کمانے کے لیے جان بوجھ کر فلم کانام 'ٹھگ آف ہندوستان' رکھاگیا ہے اس کے علاوہ نشاد سوسائٹی کو فلم میں ٹھگ اور فرنگی کہا گیا ہے جس سے اس سوسائٹی کی بے عزتی ہوتی ہے۔

اس خبرکوبھی پڑھیں: بالی ووڈ کی مہنگی ترین فلم

شکایت میں یہ نکتہ بھی اٹھایا گیا ہے کہ جب یہ کہانی کان پور ضلع کی ہے تو فلم کا نام 'ٹھگ آف ہندوستان'کیوں رکھا گیا ہے، فلم میں عامر خان فرنگی ملاح نامی ٹھگ کا کردار نبھارہے ہیں، فلم میکرز جانتے تھے کہ اس کے خلاف احتجاج ہوگا اور اس وجہ سے یہ فلم اور چلے گی۔ اس کیس کی سماعت 12 نومبر کو ہوگی۔

واضح رہے کہ فلم 'ٹھگ آف ہندوستان'کی کہانی انگریزی ناول سے لی گئی ہے فلم میں عامر خان کے ساتھ پہلی بار امیتابھ بچن ایکشن میں نظرآئیں گے جب کہ اداکارہ کترینہ کیف اور فاطمہ ثنا شیخ بھی اہم کردار نبھارہی ہیں فلم دیوالی کے موقع پر 8 نومبر کو ریلیز کی جائے گی۔