کنگنا اورسنی دیول کی فلم ’’آئی لو نیوایئر‘‘ آج ریلیزہوگی

کامیڈی فلم میں کام کرنے کا تجربہ بہت کامیاب رہا، مداحوں نے عزت دی، یکسانیت نہیں چاہتی، 25 سالہ بالی ووڈ اداکارہ کی بات چیت۔ فوٹو: فائل

---

بالی ووڈ اداکارہ کنگنا رناوت کی نئی فلم ''آئی لو نیو ایئر'' آج سینماگھروں کی زینت بنے گی، اداکارہ اس فلم میں سنی دیول کی ہیرئن بنیں گی۔

فلمساز بھوشن کمار اور کرشن کمار کی اس فلم میں کنگنا لیڈی لیڈنگ رول میں جلوہ گرہونگی۔ اس فلم کورادھیکا راؤ نے ڈائریکٹ کیا ہے ان کے ساتھ ونے سپرو نے بھی ہدایات دیں۔ اداکارہ کنگنا رناوت کے ساتھ اہم کرداروں میں پریم چوپڑا ،نوین چوہدری ،تنشتاچٹرجی ،ریما لاگو، مایا، منوج جوشی، جیتن مکھی، ویراگ مشرا اور ارباز خان جلوہ گرہورے ہیں۔ فلم کی تکمیل کے بعد اب کی تشہیری مہم کا آغاز کیا جارہا ہے۔ کنگنا رناوت کے ساتھ سنی دیول کی جوڑی اس فلم کو کامیابی سے ہمکنار کرے گی۔ یہ رومانوی کامیڈی فلم آج 26 جولائی کو سینما گھروں کی زینت بنائی جائے گی۔ نیوایئر کے واقعہ پر بنائی گئی یہ فلم صرف دو دنوں میں دو افراد کے کے درمیان وقوع پذیر ہونے والی ایسے واقعات کا احاطہ کرتی ہے جو ایک مکمل کہانی کی شکل اختیار کرجاتی ہے۔

کنگنا اور سنی دیول کی اس محبت کے اظہار کو یادگار بنانے کے لیے پریتم نے اس فلم کے میوزک کو جاندار بنایا ہے ۔ان کی دھنوں پر اداکارہ کنگنا رناوت کی پرفارمنس بھی یاد گار ہے ۔ ادھر اداکارہ کنگنا رناوت نے کہا ہے کہ مداحوں نے عزت دی اب پرستاروں کے درمیان رہوں گی۔ انھوں نے کہا کہ کامیڈی فلم کرنے کا بھی تجربہ کامیاب رہا ہے۔ لوگوں کے چہرے پر مسکراہٹیں بکھیرنا اچھا لگتا ہے اور یہ کام بھی اب کرنا جانتی ہوں۔ رومانوی کردار بھی خوبی سے نبھانے کی کوشش کرتی ہوں ۔اس فلم کی کہانی کا ایک تسلسل ہے جو شائقین کے لیے دلچسپی کا موجب ہوگی۔ انھوں نے بتایا کہ فلم ''آئی لو نیوایئر'' ریلیز کے لیے تیار ہے۔ اس فلم کے ہدایتکار رادھیکا راؤ ہیں ۔کہانی بھی شاندار ہے، شائقین کو پوری ٹیم کا کام پسند آئے گا۔ پریتم کے تیار میوزک نے بھی کمال کردیا ہے۔ اداکارہ کنگنا رناوت کا کہنا ہے کہ نئی فلم میں منفرد کردار نبھارہی ہوں۔



فلم کی کہانی بھی مختلف ہے اور کردار بھی روٹین سے ہٹ کر ہے ۔انھوں نے کہا کہ اپنی پرفارمنس کو مزید بہتر بنانے کی کوشش کی ہے۔ 25 سالہ اداکارہ کا کہنا ہے کہ آنیوالی فلموں میں بھی کردار کی ورائٹی ملے گی۔ یکسانیت نہیں چاہتی۔نئی فلموں میں نئے انداز سے پرفارم کرنے کے لیے کوشاں رہوں گی۔واضح رہے کہ 20 مارچ 1987 کو پیدا ہونے والی اداکارہ فلمی کیرئیر کا آغاز 2006 میں فلم ''گینگسٹر''سے کیا۔ اداکارہ نے اپنی پہلی فلم میں عمدہ پرفارمنس سے دھوم مچادی اس پر کنگنا نے بہترین اداکارہ کا فلم فیئر اور نیشنل فلم ایوارڈ جیت لیا۔ اداکارہ ہماچل پردیش کے ضلع منڈی کے علاقے بھمبالہ میں ایک اسکول ٹیچر کے گھر پیدا ہوئیں ،ابتدائی تعلیم اسی علاقے میں حاصل کی، کالج پہنچ کر کنگنا دہلی چلی گئیں ،جہاں انھوں نے تعلیم کے ساتھ ماڈلنگ شروع کردی،اداکارہ نے ایلیٹ ماڈلنگ ایجنسی جوائن کرلی۔ 2003 میں ماڈلنگ کے ساتھ دہلی میں ہی تھیٹر پر اداکاری کا بھی آغاز کردیا ۔اس عرصے میں انھوں نے اسمتا تھٹر گروپ کے ساتھ ملکر کئی ڈراموں میں پرفارم کیا۔ اداکارہ نے 2004 میں پہلی مرتبہ کیمرے کے سامنے چہرہ نمائی کی۔

اس کے بعد اداکارہ ممبئی چلی گئیں جہاں ہدایت کار انوراگ باسو نے انھیں کام کرنے کی پیشکش کی۔کنگنا نے انوراگ کی اس پیشکش کو قبول کرتے ہوئے کیرئیر کی پہلی فلم ''گینگسٹر''میں کام کرکے شائقین فلم کے دل جیت لیے۔ یہ فلم 2006 میں ریلیز ہوئی اور دو قومی ایوارڈز کنگنا کے حصے میں آئے۔ اسی سال اداکارہ نے فلم ''وہ لمحے ''میں ثنا کا کردار نبھایا۔ 2007 کے دوران انھوں نے دو فلموں میں پرفارم کیا ان میں فلم ''شاکالکا بوم بوم'' اور ''لائف ان اے میٹرو''شامل ہے۔ 2008 میں انھوں نے تامل فلم ''دھوم دھوم'' میں فنکارانہ صلاحیتوں کا مظاہرہ کیا، اسی برس پریانکا کے ساتھ فلم ''فیشن ''میں جلوے دکھائے اور اس فلم پر بھی شائقین کی توجہ حاصل کرنے میں کامیابی ہوئی ۔اس فلم کے لیے انھیں بہترین معاون اداکارہ کا نیشنل فلم ایوارڈ اور فلم فیئر ایوارڈ دیا گیا۔ 2009 میں اداکارہ کی فلم ''راز''ریلیز ہوئی۔ پھر فلم ''وعدہ رہا میں مختصر کردار نبھایا مگر عمدہ پرفارمنس دی۔

اسی سال فلم ''اک نرنجن ''میں جلوہ گرہوئیں۔ 2010 میں کنگنا رناوت کی 4فلمیں ریلیز ہوئیں ان میں ''کائٹس''،''ونس اپان اے ٹائم ان ممبئی''،''ناک آؤٹ'' اور ''نو پرابلم'' شامل ہیں۔ 2011 میں فلم ''تنیو ویڈز مینو'' ، ''گیم''،''ریڈی''،''ڈبل دھمال''، ''راسکلز'' اور ''ملیں نہ ملیں ہم''شامل ہیں۔ 2012 میں کنگنا رناوت کی فلم ''تیز ''میں جلوہ گرہوئیں۔ بالی وڈ اداکارہ کے حوالے سے بالی وڈ حلقوں کا کہنا ہے کہ اداکارہ کی پرفارمنس نے شائقین کو متاثر کیا ہے۔ نئے کرداروں کو خوبی سے نبھانے کا سلیقہ جانتی ہیں۔ ان کی آنیوالی فلموں سے بجا طور پر مثبت توقعات وابستہ کی جا سکتی ہیں۔