ایران نے برطانوی جہاز کو قبضے میں لینے کی ویڈیو جاری کردی

پاسداران انقلاب کے اہلکار ہیلی کاپٹر کے ذریعے برطانوی آئل ٹینکر پر اتر رہے ہیں۔ فوٹو: ویڈیو گریب

---

WASHINGTON: ایران نے برطانوی بحری جہاز 'دی سٹینا امپیرو' کو تحویل میں لیے جانے کی کارروائی کی مکمل ویڈیو جاری کردی۔

عالمی خبر رساں ادارے کے مطابق ایران نے برطانوی آئل ٹینکر پر پاسداران انقلاب کے اہلکاروں کے قبضے کی کارروائی کی ویڈیو جاری کردی ہے جس میں دیکھا جا سکتا ہے کہ 4 کشتیوں نے آئل ٹینکر کو چاروں طرف سے حصار میں لے رکھا ہے اور ایک ملٹری ہیلی کاپٹر آئل ٹینکر کے اوپر محو پرواز ہے۔

دوسرے ہی لمحے پاسداران انقلاب کے نقاب پوش اہلکار برطانوی آئل ٹینکر کے اندر داخل ہوجاتے ہیں اور عملے کو تحویل میں لے لیتے ہیں۔ اس ویڈیو کو دو کیمروں کی مدد سے فلم بند کیا گیا ہے، ایک کیمرہ مین اسپیڈ بوٹ پر سوار ہے جب کہ دوسرے نے ہیلی کاپٹر سے فلم بندی کی۔

یہ خبر بھی پڑھیں : ایران نے آبنائے ہرمز میں برطانوی آئل ٹینکر قبضے میں لے لیا

ادھر ایران کے وزارت خارجہ کی جانب سے جاری بیان میں کہا گیا ہے کہ قبضے میں لیے گئے برطانوی آئل ٹینکر کے عملے کے 23 ارکان مکمل خیریت سے ہیں۔ عملے میں زیادہ تر بھارتی، فلپائنی اور روسی شہری شامل ہیں۔

دوسری جانب برطانوی بحری جہاز دی سٹینا امپیرو کی ملکیت رکھنے والی کمپنی کے مالک نے عملے کے ارکان سے ملنے کی اجازت حاصل کرنے کے لیے قانونی چارہ جوئی کا آغاز کردیا ہے۔

یہ خبر پڑھیں : ایران تیل بردار جہاز چھوڑ دے ورنہ

واضح رہے کہ ایران نے گزشتہ روز آبنائے ہرمز میں برطانوی آئل ٹینکر کو پورٹ انتظامیہ اور میری ٹائم آرگنائزیشن کی جانب سے عالمی قوانین کی خلاف ورزی کی نشاندہی پر تحویل میں لیا تھا۔ برطانیہ نے اپنے بحری جہازوں کو تحویل میں لینے پر ایران کو سنگین نتائج بھگتنے کی دھمکی بھی دی تھی۔