سابق افغان وزیر اعظم گلبدین حکمت یار اسلام آباد پہنچ ‏گئے

ہم پاکستان کو اپنا ‏‏دوسرا گھر سمجھتے ہیں، حزب اسلامی افغانستان کے سربراہ اور سابق افغان وزیراعظم گلبدین حکمت یار (فوٹو: سرکاری ٹی وی)

---

حزب اسلامی افغانستان کے سربراہ اور سابق افغان وزیراعظم گلبدین حکمت یار تین روزہ دورے پر اسلام آباد پہنچ ‏گئے جہاں انہوں ںے شاہ محمود قریشی سے ملاقات کی۔

گلبدین حکمت یار اور وزیر خارجہ شاہ محمود قریشی کی ملاقات میں پاک افغان دو طرفہ ‏تعلقات، افغانستان میں قیام امن کے لیے جاری بین الافغان مذاکرات سمیت باہمی ‏دلچسپی کے امور پر تبادلہ خیال کیا گیا۔

‎شاہ محمود قریشی نے کہا کہ وزیراعظم عمران خان نے واضح طور پر کہا تھا کہ افغان ‏‏مسئلے کے دیرپا حل کا واحد راستہ، افغانوں کے قابل قبول سیاسی مذاکرات ہیں، ‏‏خوشی ہے کہ آج عالمی سطح پر پاکستان کے موقف کو سراہا جا رہا ہے، بین الافغان ‏‏مذاکرات کی صورت میں افغان قیادت کے پاس افغانستان میں امن کی بحالی کا ایک نادر ‏‏موقع ہے، پاکستان، افغانستان سمیت خطے میں قیام امن کے لیے اپنی کاوشیں جاری رکھے گا۔

وزیر خارجہ شاہ محمود قریشی سے سربراہ حزب اسلامی گلبدین حکمت یار کی ملاقات
ملاقات میں دوطرفہ تعلقات اور افغان امن عمل پر تبادلہ خیال @SMQureshiPTI pic.twitter.com/4vlSFVTiDz

— PTV News (@PTVNewsOfficial) October 19, 2020

ترجمان دفتر خارجہ کے مطابق گلبدین حکمت یارنے کہا کہ ہم پاکستان کواپنا ‏‏دوسرا گھر سمجھتے ہیں۔ ترجمان کے مطابق حزب اسلامی افغانستان کے ‏‏سربراہ گلبدین حکمت یار کا یہ دورہ پاکستان اورافغانستان کے مابین وسیع تر دو طرفہ ‏‏روابط کے فروغ کے لیے کی جانے والی کاوشوں کا اہم حصہ ہے۔

ترجمان کے مطابق گلبدین حکمت یار 19 ‏‏سے 21 اکتوبر تک پاکستان میں قیام کریں گے۔ افغان رہنما صدر پاکستان ، وزیراعظم ، چیئرمین سینیٹ، ا‏‏سپیکر قومی اسمبلی سمیت دیگر اہم شخصیات سے ملاقاتیں کریں گے۔