بھارتی چینلز اور مواد نشر کرنے والے کیبل آپریٹرز کیخلاف کارروائی

(فوٹو فائل)

---

پیمرا کی جانب سے غیر قانونی بھارتی چینلزاور مواد نشر کرنے والے کیبل آپریٹرز کے خلاف کارروائی کی گئی۔

چیئرمین پاکستان الیکٹرانک میڈیا ریگولیٹری اتھارٹی (پیمرا) کی ہدایات پر پیمرا کے ریجنل دفاتر کراچی، حیدرآباد، سکھراور ملتان کے فیلڈ اسٹاف نے غیر قانونی بھارتی چینلز چلانے والے کیبل آپریٹرزکے خلاف کارروائی کرتے ہوئے غیرقانونی چینلز کی ترسیل میں استعمال ہونے والے آلات کو ضبط کر لیا۔

سپریم کورٹ کے احکامات اور پیمرا کے ماضی میں جاری کردہ نوٹسزکی روشنی میں کیبل آپریٹرز کے دفاترکی انسپکشن کے دوران پیمرا ریجنل آفس کراچی نے میسرز ڈیلٹا ڈیجیٹل نیٹ ورک، میسرز ہوم میڈیا کمیونیکیشن (پرائیویٹ) لمیٹڈ اور میسرز اسکائی کیبل ویژن میں کارروائی۔

پیمرا ریجنل آفس ملتان نے میسرز سٹی ڈیجیٹل کیبل نیٹ ورک، میسرز اسٹیٹ کیبل نیٹ ورک، میسرز نصیب اینڈ جمیل کیبل نیٹ ورک، میسرز ورلڈ برائٹ کیبل نیٹ ورک، میسرز اسٹار انفارمیشن کمپنی اور میسرز گلوبل سگنلز کیبل نیٹ ورک میں کارروائی کی۔

پیمرا ریجنل آفس سکھر نے سکھر اور لاڑکانہ کے اضلاع میں کارروائی کرتے ہوئے میسرز میڈیا پلس نیٹ ورک لاڑکانہ اور میسرز یونیورسل کیبل ٹی وی نیٹ ورک لاڑکانہ کو پیمرا قوانین کی خلاف ورزی کا مرتکب پائے جانے والے کیبل آپریٹرز کے غیر قانونی چینلز کی ترسیل میں استعمال ہونے والے آلات کو ضبط کر لیا۔

علاوہ ازیں قانون کی خلاف ورزی کرنے والے مذکورہ کیبل آپریٹرز کو اظہار وجوہ کے نوٹسزبھی جاری کیے گئے ہیں، جن پر پیمرا قوانین کے تحت سزا کا تعین کیا جائے گا۔

پیمرا ریجنل آفس حیدرآباد نے سانگھڑ، ٹھٹھہ، سجاول اور حیدرآباد کے اضلاع میں 23کیبل نیٹ ورکس کا دورہ کیا، جس میں 8 کیبل نیٹ ورکس کو پیمرا قوانین کی خلاف ورزی کرنے پر ان کے 24سیٹلائٹ رسیورزاور ایک ٹرانسمیٹر ضبط کرتے ہوئے کیبل آپریٹرز کو اظہار وجوہ کے نوٹسزجاری کردیے۔

پیمرا کی جانب سے کہا گیا ہے کہ غیر قانونی /بھارتی چینلز کی تقسیم کار، غیر مہذ ب مواد کی تقسیم کے حوالے سے کوئی بھی رعایت نہیں برتی جائے گی۔ تمام کیبل آپریٹرز کو ایک بار پھر متنبہ کیا جاتا ہے کہ و ہ غیر قانونی بھارتی مواد اور بھارتی چینلز کی نشریات بند کر دیں بصورت دیگر ان کے خلاف پیمرا قوانین کے تحت سخت تادیبی کارروائی کی جائے گی۔