بھارتی فوج کی ایل او سی پر فائرنگ سے دو شہری شہید ایک زخمی

(فوٹو : فائل)

---

بھارتی فوج کی ایل او سی پر بلاسبب فائرنگ سے دو کشمیری باشندے شہید اور ایک زخمی ہوگیا۔

آئی ایس پی آر کے مطابق بھارتی فوج نے لائن آف کنٹرول (ایل او سی) کے سیکٹر سٹوال میں بلااشتعال فائرنگ کی جس کے سبب دو شہری شہید ہوگئے اور ایک شہری زخمی ہوگیا۔ مقامی ذرائع نے شہریوں کی ہلاکت اور زخمی ہونے کی تصدیق کی ہے۔

ذرائع کے مطابق بھارتی فوج نے ایل او سی کے قریب بکریاں چرانے والوں پر فائرنگ کی۔ جاں بحق ہونے والوں کی شناخت 22 سالہ عبید قیوم اور 55 سالہ محمد قاسم کے ناموں سے ہوئی، دونوں افراد ضلع پونچھ کی تحصیل ہجیرہ کے رہائشی تھے۔

آئی ایس پی آر نے کہا ہے کہ پاکستان ایل او سی پر کشمیریوں کی جانوں کے تحفظ کے لیے اپنی مرضی کا جواب دینے کا حق محفوظ رکھتا ہے۔

بھارتی ناظم الامور کی دفتر خارجہ طلبی، واقعے پر شدید احتجاج

دریں اثنا ایل او سی پر فائرنگ سے دو شہریوں کی شہادت پر پاکستان نے بھارتی ناظم الامور کو دفتر خارجہ طلبی کرکے شدید احتجاج کیا، پاکستان نے واقعے کی شدید مذمت کرتے ہوئے احتجاجی مراسلہ بھارت کے حوالے کردیا۔

ترجمان دفتر خارجہ نے کہا کہ لائن آف کنٹرول کے ستوال سیکٹر میں بھارتی فورسز کی جانب سے جنگ بندی کی خلاف ورزی کی گئی جس کے نتیجے میں دو شہری جاں بحق اور ایک زخمی ہوا، پاکستان بھارتی فورسز کی جانب سے معصوم شہریوں کو نشانہ بنانے کی شدید مذمت کرتا ہے۔

ترجمان دفتر خارجہ نے کہا کہ بھارتی ناظم الامور کو آج وزارت خارجہ میں طلب کرکے شدید احتجاج ریکارڈ کرایا گیا، ایسی کارروائیاں 2003 کے سیز فائر مفاہمت کی صریح خلاف ورزی ہیں، بھارت جنگ بندی کی مفاہمت کا احترام کرے۔