الیکشن کمیشن کے تمام ارکان مستعفی ہوجائیں خورشید شاہ

عمران خان کبھی نہیں چاہیں گے کہ ملک میں آمریت آئے، قائد حزب اختلاف۔ فوٹو: فائل

---

پاکستان تحریک انصاف کے بعد قومی اسمبلی میں قائد حزب اختلاف سید خورشید شاہ نے بھی الیکشن کمیشن کے تمام اراکین سے مستعفی ہونے کا مطالبہ کردیا۔

اسلام آباد میں میڈیا سے غیر رسمی گفتگو کرتے ہوئے خورشید شاہ کا کہنا تھا کہ آمریت کے سائے بڑھ رہے ہیں لیکن سیاسی جماعتیں اتنی طاقتور ہیں کہ وہ آمریت کا ڈٹ کر مقابلہ کرسکتی ہیں، انہوں نے کہا کہ سیاسی جماعتوں کو مل بیٹھ کر معاملات ٹھیک کرنے چا ہیئیں، انتخابی اصلاحات کا مطالبہ صرف تحریک انصاف کا نہیں پوری قوم کا ہے، عمران خان کبھی نہیں چاہیں گے کہ ملک میں آمریت آئے۔

اپوزیشن لیڈر نے کہاکہ عام انتخابات میں دھاندلی پر الیکشن کمیشن کو سابق چیف الیکشن کمشنر فخرالدین جی ابراہیم کے ساتھ ہی مستعفی ہوجانا چاہیئے تھا، یہ نہیں کہتے تھے فخر الدین جی ابراہیم مخلص انسان نہیں تاہم وہ شفاف انتخابات کروانے میں ناکام رہے ہیں، انہوں نے مزید کہاکہ ایم کیو ایم کے قائد الطاف حسین پاکستانی ہیں، حکومت کو ایم کیو ایم کے قائد کو ہنگامی بنیادوں پر شناختی کارڈ اور پاسپورٹ ملنا چاہیئے۔

واضح رہے کہ 11 مئی کو اسلام آباد میں منعقدہ جلسے میں عمران خان نے عام انتخابات میں دھاندلی پر الیکشن کمیشن کے تمام عملے کو مستعفی کرنے کا مطالبہ کیا تھا۔