اچھے پڑوسی کا تعلق قائم ہونے کیلیے دعاگو ہیںاسرائیل کا سعودی قومی دن پر پیغام

خدا کرے یہ دن سعودی عرب کے لیے خیر اور برکتیں لائے؛ اسرائیل (فوٹو: فائل)

---

سعودی عرب کا 93 ویں قومی دن پر اسرائیل نے مبارک باد دیتے ہوئے کہا ہے کہ اس اہم دن پر خدا آپ کے لیے برکتیں لائے اور ہمارے درمیان امن و اچھے ہمسائے کا تعلق قائم ہو۔

عالمی خبر رساں ادارے کے مطابق ایک اہم پیشرفت میں سعودی عرب کے قومی دن کی مناسبت پر اسرائیلی وزارت خارجہ کی جانب سے جاری بیان میں سعودی عرب کے بادشاہ، حکومت اور عوام کو مبارک باد دی گئی اور نیک تمناؤں کا اظہار کیا گیا ہے۔

بیان میں کہا گیا ہے کہ خدا کرے یہ دن آپ کے لیے خیر اور برکتیں لے کر آئے۔ ہماری خواہش ہے کہ امن، تعاون اور اچھی ہمسائیگی کی فضا قائم رہے۔

یہ خبر پڑھیں : سعودیہ کے بعد مزید7 مسلم ممالک بھی ہمیں تسلیم کرلیں گے؛ اسرائیل

یاد رہے کہ اسرائیلی وزیراعظم نیتن یاہو نے جمعہ کو اقوام متحدہ کی جنرل اسمبلی سے خطاب میں سعودی عرب کے درمیان تاریخی امن معاہدے کے قریب پہنچنے کا دعویٰ کیا تھا۔

ادھر سعودی ولی عہد محمد بن سلمان نے بھی امریکی میڈیا کو انٹرویو میں کہا تھا کہ دونوں ممالک تعلقات کو معمول پر لانے کے قریب پہنچ رہے ہیں تاہم اس میں رکاوٹ فلسطین کا دو ریاستی حل کا نہ ہونا ہے۔