سیکیورٹی فورسز نے تحصیل ماموند گاؤں ترخو کو کلیئر قرار دے دیا جس کے بعد آپریشن کے سبب بے گھر ہوئے متاثرین کی واپسی شروع ہوگئی۔
ایکسپریس نیوز کے مطابق تحصیل ماموند کے گاؤں ترخو کے متاثرین کی باعزت واپسی کا عمل آج سے شروع ہوگیا ہے اس حوالے سے ضلعی انتظامیہ نے اعلامیہ جاری کر دیا۔
اعلامیے میں کہا گیا ہے کہ سیکیورٹی فورسز نے گاؤں ترخو، تحصیل لوئی ماموند کو مکمل طور پر کلیئر کر دیا ہے، دیگر علاقوں کے متاثرہ خاندانوں کی واپسی کا عمل مرحلہ وار اور منظم طریقے سے مکمل کیا جائے گا۔
ضلعی انتظامیہ نے کہا ہے کہ گاؤں ترخو کے باشندوں کے صبر و تحمل اور قربانیوں کو سراہتے ہیں۔
