وزیراعظم آزاد کشمیر چوہدری انوار الحق نے عوامی ایکشن کمیٹی کو مذاکرات کی دعوت دے دی۔
اسلام آباد میں وفاقی وزیر برائے پارلیمانی امور طارق فضل چوہدری کے ہمراہ مشترکہ پریس کانفرنس کرتے ہوئے وزیراعظم آزاد کشمیر نے کہا کہ عوامی ایکشن کمیٹی نے پُرامن احتجاج کا اعلان کیا تھا مگر صورت حال مختلف ہوگئی ہے۔
انہوں نے کہا کہ آزاد کشمیر کے مختلف علاقوں میں مشتعل افراد نے پُرتشدد مظاہرے اور پولیس اہلکاروں پر فائرنگ کی جس میں تین اہلکار شہید جبکہ دس زخمی ہوئے ہیں۔
چوہدری انوار الحق نے کہا کہ عوامی ایکشن کمیٹی کے احتجاج میں مختلف علاقوں سے آئے لوگ شامل ہیں، اگر یہ صرف کشمیر کے لوگ ہوتے تو شاید احتجاج اس طرح نہیں ہوتا۔
انہوں نے کہا کہ میں ایک بار پھر عوامی ایکشن کمیٹی کے ذمہ داران کو مذاکرات کی دعوت دیتا ہوں، آئیں اور بات چیت کریں، حکومت مظاہرین کے جائز مطالبات کو تسلیم کرے گی۔
وزیراعظم آزاد کشمیر نے کہا کہ اس سے قبل ستمبر عوامی ایکشن کمیٹی کے 90 فیصد مطالبات تسلیم کرلیے تھے مگر اس کے باوجود انہوں نے احتجاج کا اعلان کیا۔
وفاقی وزیر طارق فضل چوہدری نے کہا کہ عوامی ایکشن کمیٹی نے پرامن احتجاج کے بجائے اب تشدد کا راستہ اختیار کرلیا ہے، وزیراعظم نے مذاکرات کے حوالے سے میری ذمہ داری لگائی ہے۔
انہوں نے کہا کہ وزیراعظم کی ہدایت پر عوامی ایکشن کمیٹی کے رہنماؤں سے مذاکرات کیے جائیں گے اور اُن کے مطالبات کو حل کرنے کی کوشش کریں گے۔ اسی کے ساتھ طارق فضل چوہدری نے دعویٰ کیا کہ حکومت عوامی ایکشن کمیٹی کے 90 فیصد مطالبات پہلے ہی تسلیم کرچکی ہے جبکہ مزید معاملات پر بھی بات کرنے کو تیار ہے۔
