اسلام آباد:
وزیر اعظم شہباز شریف نے بھارت کیخلاف ایشیا کپ میں شاندار کامیابی پر قومی انڈر 19 ٹیم کے اعزاز میں ظہرانہ دیا۔
ذرئع کے مطابق فائنل میں کامیابی پر وزیراعظم نے قومی انڈر 19 ٹیم کے ہر کھلاڑی کے لیے 1،1 کروڑ روپے کا اعلان کیا، شہبازشریف نے تمام کھلاڑیوں کا خود استقبال کیا اور فرداً فرداً تمام کھلاڑیوں سے مصافحہ کیا۔
وزیراعظم شہباز شریف نے انڈر 19 کرکٹ ٹیم کے کھلاڑیوں اور مینجمنٹ کو بھارت کے خلاف شاندار کامیابی پر مبارکباد دی۔ اس موقع پر چیئرمین پی سی بی محسن نقوی اور وفاقی وزراء بھی موجود تھے۔
وزیراعظم نے کہا کہ انڈر 19 ٹیم نے قوم کا سر فخر سے بلند کر دیا ہے۔ اتنے بڑے مارجن سے کامیابی بلا شبہ محنت اور لگن کا نتیجہ ہے۔ انہوں نے تمام کھلاڑیوں، مینجمنٹ اور سپورٹنگ اسٹاف کو بھی مبارکباد پیش کی۔
فائنل میچ میں شاندار کارکردگی پر وزیر اعظم نے خاص طور پر سمیر منہاس کو خصوصی شاباش دی۔ اس موقع پر چیئرمین پی سی بی محسن نقوی نے بھی ٹیم اور مینجمنٹ کو مبارکباد دی۔
واضح رہے کہ قومی انڈر 19 ٹیم نے گزشتہ روز ایشیا کپ کے فائنل میں روایتی حریف بھارت کو 191 رنز کے بھاری مارجن سے شکست دی تھی۔
پاکستان کی فاتح انڈر 19 کرکٹ ٹیم اتوار اور پیر کی درمیانی شب وطن واپس پہنچی تھی جہاں نوجوان شاہینوں کا شاندار، پُرجوش اور یادگار استقبال کیا گیا۔
خیال رہے کہ چیئرمین پاکستان کرکٹ بورڈ محسن نقوی بھی قومی انڈر 19 ٹیم کے ہر کھلاڑی کو 50 لاکھ روپے انعام دینے کا اعلان کرچکے ہیں۔
