پاکستان کا پٹھان کوٹ حملے کی تحقیقات کیلیے خصوصی ٹیم بھارت بھیجنے کا فیصلہ

پاکستان نے حملے سے متعلق مزید معلومات مانگ لیں تاہم ٹیم بھارتی حکام سے مشاورت کےبعد بھیجی جائے گی، اعلامیہ، فوٹو؛ فائل

---

پاکستان نے پٹھان کوٹ حملے کی تحقیقات کےلیے بھارت سے مزید معلومات مانگ لی ہیں جب کہ معاملے کی تحقیقات کے لیے خصوصی ٹیم کو بھی بھارت بھیجنے کا فیصلہ کیا گیا ہے۔

ایکسپریس نیوزکے مطابق وزیراعظم نوازشریف کی زیرصدارت اپیکس کمیٹی کے اجلاس میں وفاقی وزیرداخلہ چوہدری نثارعلی خان، وزیرخزانہ اسحاق ڈار، سربراہ پاک فوج جنرل راحیل شریف، ڈی جی آئی ایس آئی لیفٹیننٹ جنرل رضوان اختر، مشیرخارجہ سرتاج عزیز، قومی سلامتی کے مشیر ناصرجنجوعہ، معاون خصوصی طارق فاطمی اور دیگر اعلی حکام نے شرکت کی۔ اجلاس کے دوران اہم ملکی امور، نیشنل ایکشن پلان، پٹھان کوٹ حملے اور سعودی عرب ایران کشیدگی کے علاوہ دیگر اہم امورپرتبادلہ خیال کیا گیا۔

اجلاس کے دوران شرکا نے بھارتی ایئربیس پٹھان کوٹ حملے کی تحقیقات اورتفتیش میں پیش رفت پراطمینان کا اظہارکیا۔ وزیراعظم ہاؤس کی جانب سے اپیکس کمیٹی کے جاری اعلامیے کے مطابق پٹھان کوٹ واقعے میں اہم پیشرفت سامنے آئی ہے اور بھارت کی جانب سے فراہم کردہ معلومات اور ابتدائی تفتیش کی روشنی میں حملے میں ملوث ملزمان کو گرفتارکیا جاچکا ہے جن کا تعلق کالعدم جیش محمد سے ہے جب کہ ابتدائی معلومات کے مطابق کالعدم جیش محمد کے متعدد ارکان کو گرفتار کرتے ہوئے ان کے دفاترسیل کردیئے۔

اعلامیے میں کہا گیا ہے کہ دہشت گردی کے مکمل خاتمے کے عزم کے تحت بھارت سے رابطے میں ہیں اور حکومت ایک خصوصی تحقیقاتی ٹیم کو پٹھان کوٹ بھیجے گی تاہم اس حوالے سے بھارتی حکام سے مشاورت کے بعد ٹیم کو بھیجا جائے گا جب کہ پاکستان نے بھارت سے مزید معلومات بھی مانگ لی ہیں۔