ریچل گل نے پوجا بھٹ کی فلم میں بولڈ کردار کی پیشکش ٹھکرا دی

بطوراداکارہ سرحدوں کی محتاج نہیں مگرپہلے ایک پاکستانی ہوں لہذا ایسا کام نہیں کرسکتی جس سے وطن کی بدنامی ہو، ریچل گل فوٹو : فائل

---

ISLAMABAD: فیشن انڈسٹری پر برسوں سے راج کرنے والی ماڈل ریچل گل نے اداکاری کے میدان میں اترتے ہی بالی ووڈ فلم میں بولڈ کردار کی پیشکش کوٹھکرادیا۔ انھیں معروف اداکارہ اور فلم میکر پوجابھٹ کی جانب سے اپنی فلم میں ایک بولڈ کردار کرنے کی آفرہوئی تھی لیکن سپرماڈل نے اسے قبول نہ کیا۔

جب اس سلسلہ میں ریچل گل سے رابطہ کیا گیا تو انھوں نے ''ایکسپریس'' کوبتایا کہ بطور ماڈل اور اداکارہ میں سرحدوں کی محتاج نہیں ہوں لیکن میں پہلے ایک پاکستانی ہوں اور کبھی بھی ایسا کام کرنے کا نہیں سوچ سکتی جس سے میرے وطن کی بدنامی ہو۔ مجھے کچھ عرصہ قبل پوجا بھٹ کی جانب سے اپنی نئی فلم میں ایک انتہائی بولڈ کردار آفر ہوا تھا اگر میں چاہتی تو سستی شہرت اور بالی ووڈ میں ''زبردست'' انٹری کے لیے اس کو قبول کرلیتی مگر میری ترجیحات یہ نہیں ہیں۔

میں نے ریلیزہونے والی فلم '' ہلہ گلہ'' کے ٹائٹل سانگ میں پرفارم کیا تھا جس کی وجہ سے زبردست رسپانس ملا اور اب پاکستانی فلموں میں اہم کرداروں کی آفرز ہو رہی ہیں۔ ان میں سے ایک فلم ''سایہ خدائے ذوالجلال'' سائن کرنے کے بعد اپنا کام بھی عکسبند کروایا ہے۔ یہ ایک بہت ہی منفرد تجربہ تھا کیونکہ ایکٹنگ ایک مشکل کام ہے اور اس موقع پربہت سے سینئرفنکاروں نے میری خوب رہنمائی کی۔ ریچل نے کہا کہ بڑی اسکرین پر کام کرنا اعزاز کی بات ہے۔

میں نے اب سنجیدگی سے فلموں میں کام کرنے کی ٹھان لی اوراسی لیے اب میں نے فیشن شوزمیں ریمپ پرواک کرنے میں کمی کر دی ہے۔ میری زیادہ توجہ ایکٹنگ اور ڈانس پرہے۔ بالی ووڈ سے اگر کوئی اچھی آفر ہوئی تو میں ضرور بھارت میں جا کر کام کرنا چاہوں گی۔ بالی وڈ ایک بڑی فلم انڈسٹری ہے اورپھر کسی دوسرے ملک میں جا کر اچھا اور معیاری کام کیا جائے تو اس سے اپنے ملک کا نام روشن ہوتا ہے۔ اس لیے میں منفرد کرداروں کی تلاش میں ہوں، معمول کی فلمیں اور کردار اگر آفر ہوئے تو میں ان کو کبھی قبول نہیں کروں گی۔