پاکستانی لڑکی کو ’’ماحول دوست کاروبار‘‘ شروع کرنے پر ملکی و غیرملکی ایوارڈ سے نوازا گیا

زیمل عمر کو پاکستان کے سیکریٹری تعلیم کی جانب سے گولڈ میڈل اور سعودی عرب میں بھی شاہ عزیز ایوارڈ سے نوازا گیا، فوٹو؛ فائل

---

سرگودھا کی 9 سالہ بچی زیمل عمر نے ایک ماحول دوست کاروباری منصوبہ شروع کرکے نہ صرف دنیا کو حیران کردیا بلکہ پاکستان کی سب سے کم عمر سوشل اینٹرپرونیئر کا اعزاز بھی حاصل کرلیا۔

زیمل سرگودھا کی سڑکوں پر کاغذات اور پلاسٹک بیگز کی بھرمار سے پریشان تھیں اور انہوں نے اس سے کارآمد اشیا بنانا شروع کرکے زی بیگز نام سے ایک چھوٹا سا کاروبار شروع کیا ہے جسے بہت پذیرائی مل رہی ہے۔



ایکسپریس ٹریبیون سے بات کرتے ہوئے زیمل نے کہا کہ 3 برس قبل وہ اپنے والدین کے ساتھ خریداری کررہی تھیں کہ ان کے ذہن میں کوڑا کرکٹ کو کارآمد اشیا میں تبدیل کرنے کا خیال آیا۔ ان کا کہنا تھا کہ وہ پلاسٹک کی آلودگی کے خلاف تھیں اور اس کے لیے ان کو ایک دکاندار نے بہت متاثر کیا کیوں کہ وہ گاہکوں کو پلاسٹک بیگز کی بجائے پرانے اخبارات سے بنی تھیلیوں اور لفافے میں اشیا فروخت کررہا تھا۔

زیمل نے کہا کہ اس کے بعد انہیں بھی پلاسٹک اور اخبار سے بیگز اور اشیا بنانے کا خیال آیا جس کے بعد انہوں نے سینکڑوں بیگ بناکر فروخت کیے اور اس کی رقم ایک فلاحی تنظیم ایس او ایس ولیج کو دی جہاں یتیم بچوں کی کفالت کی جاتی ہے۔ زیمل کا کہنا تھا کہ ان کو یہ کام بہت پسند ہے اور وہ بڑی محنت سے بیگ بناکر اس پر نقش ونگاری کرکے اسے خوبصورت بناتی ہیں۔

زیمل کا کہنا تھا کہ وہ ملک سے غربت ختم کرنا چاہتی ہیں اور ان کی خواہش ہے کہ ایسا کاروبار شروع کیا جائے جس سے ماحول کو فائدہ پہنچ سکے۔

پاکستان کی سب سے کم عمر کاروباری شخصیت کے ناطے زیمل کو پاکستان کے سیکریٹری تعلیم کی جانب سے گولڈ میڈل عطا کیا گیا ہے اور سعودی عرب مدعو کرکے شاہ عزیز ایوارڈ بھی دیا گیا ہے جو بچوں کی حوصلہ افزائی کے لیے جاری کیا گیا ہے۔