گراؤنڈ میں تیر کہاں سے آیا برطانوی پولیس چکرا گئی

جان لیوا ہوسکتا تھا، سرے کپتان۔ فوٹو : فائل

---

اوول گراؤنڈ میں تیر گرنے کا معمہ حل نہ ہوسکا، پولیس چکرا کر رہ گئی ہے۔

اوول گراؤنڈ میں سرے اور مڈل سیکس میں کاؤنٹی کرکٹ میچ جاری تھا کہ اچانک گراؤنڈ کے باہر سے 18انچ لمبا تیر پچ کے قریب آ گرا، کھلاڑیوں کے مطلع کرنے پر میچ آفیشلز نے فوری طور پر کھیل رکوا دیا اور پولیس کو طلب کر لیا گیا، سیکیورٹی خدشات کے پیش نظر اسٹینڈز بھی خالی کرا لیے گئے جب کہ پولیس کا کہنا تھا کہ تیر گراؤنڈ کے باہر سے آیا تاہم کوئی گرفتاری عمل میں نہیں لائی گئی ہے۔

ادھر سرے کے کپتان گیراتھ بیٹی نے کہاکہ تیر کا سرا دھات کا بنا ہوا اور خاصا تیز نظر آرہا تھا، میں نے عام طور پر ایسا تیر نہیں دیکھا،وہ اگر کسی کو لگ جاتا تو مہلک ثابت ہوسکتا تھا۔ دوسری جانب سرے کے چیف ایگزیکٹیو رچرڈ گولڈ کا کہنا ہے کہ اس واقعے پر دہشت گردی کے شکوک ظاہر نہیں کیے جاسکتے لیکن میدان کے باہر سے 800میٹر فاصلہ طے کرکے پچ کے قریب آنے والے تیر نے بہت بڑی پریشانی پیدا ضرور کردی۔

رچرڈ گولڈ نے کہا کہ اوسی ایس اسٹینڈز کے قریب شور ضرور سنا گیا تھا تاہم ابھی حتمی طور پر نہیں کہا جاسکتا کہ تیر وہیں سے چلایا گیا،یہ بھی معلوم نہیں کیا جا سکا کہ تیر جان بوجھ کر چلایا گیا یا اطراف میں کسی سے چل گیا، انھوں نے کہا کہ اپنے سیکیورٹی انتظامات اور ممکنہ احتیاطی تدابیر پراز سرنو غور کررہے ہیں،کافی فاصلے سے اسٹیڈیم میں آنے والی چیزوں کو روکنا کوئی آسان کام نہیں ہوگا لیکن پوری کوشش کریں گے کہ آئندہ اس نوعیت کی پریشانی نہ ہو۔