لاپتا بھارتی نوجوان امرجیت سنگھ کا پتا چل گیا

امرجیت فیس بک کے ذریعے دوست بننے والے شیخوپورہ کے رہائشی عامر رزاق کے گھر تین سے مہمان تھا

آصف محمود April 23, 2018

امرجیت فیس بک کے ذریعے دوست بننے والے شیخوپورہ کے رہائشی عامر رزاق کے گھر تین دن سے مہمان تھا (فوٹو: ایکسپریس)

متروکہ وقف املاک بورڈ اور قانون نافذ کرنے والے اداروں نے چار روز سے لاپتا بھارتی نوجوان امرجیت سنگھ کو بالآخر تلاش کرلیا۔

متروکہ وقف املاک بورڈ ذرائع کے مطابق امرجیت شیخوپورہ میں اپنے ایک دوست عامر رزاق کے گھر مہمان تھا۔ امرجیت اور عامر رزاق کی فیس بک پر دوستی ہوئی تھی۔

یہ پڑھیں: بیساکھی میلے میں شرکت کرنے والا بھارتی سکھ نوجوان لاپتہ ہوگیا

امرجیت نے ننکانہ صاحب پہنچنے پر عامر سے رابطہ کیا کہ وہ اس سے ملنا چاہتا ہے، عامر کے کہنے پر وہ ننکانہ صاحب سے شیخو پورہ پہنچ گیا۔ عامررزاق نے امرجیت کی خوب مہمان نوازی کی اور وہ تین دن سے اس کے گھرمیں ہی مہمان تھا۔

امرجیت نے عامر سے جھوٹ بولا کہ اس کے پاس تین ماہ کا ویزا ہے تاہم اس کے لاپتا ہونے کی خبر میڈیا پر نشر ہوئی تو عامر پریشان ہوگیا اور اس نے متروکہ وقف املاک بورڈ کو اطلاع دی کہ بھارتی نوجوان اس کے گھر میں مہمان ہے، جس پرامرجیت سنگھ کو عامررزاق کے گھرسے تلاش کرلیا گیا۔ اطلاعات کے مطابق امرجیت کو کل واہگہ بارڈر کے راستے بھارت بھیج دیا جائے گا۔

یہ پڑھیں: بھارتی نومسلم خاتون کے ویزا میں 6 ماہ کی توسیع

یاد رہے کہ 23 سالہ امرجیت سنگھ امرتسرکا رہائشی ہے وہ 12 اپریل کو بیساکھی میلہ منانے پاکستان آیا اور لاپتا ہوگیا تھا۔ امرجیت سنگھ کے لاپتا ہونے کا انکشاف 21 اپریل کو ہوا تھا۔