انٹرنیٹ کے ذریعے بھتہ طلبہ پر خفیہ اداروں سے مدد طلب

بھتے کی کالیں افغانستان اور ایران سے آئی ہیں،پولیس نے تھریٹ اسسمنٹ کمیٹی بنادی ،آئی جی

Staff Reporter May 12, 2018

فاروق ستار،خواجہ اظہار،مصطفی کمال،آفاق احمد کو تحفظ فراہم کردیا،مال خانہ آتشزدگی کی رپورٹ جمع کرادی۔ فوٹو: فائل

انسپکٹر جنرل پولیس سندھ نے کہا ہے کہ چند اراکین اسمبلی سمیت شہریوں کو انٹرنیٹ کے ذریعے بھتے کے پیغامات ملے ہیں جس پر پولیس نے خفیہ اداروں سے مدد طلب کی ہے۔

آئی جی سندھ اے ڈی خواجہ نے مزید بتایا کہ عدالت کی جانب سے ازخود نوٹس لینے کے بعد سندھ حکومت نے ایک تھریٹ اسسمنٹ کمیٹی تشکیل دی ہے جس میں حساس اداروں کے نمائندے ، پولیس ، سیکریٹری داخلہ، کمشنرز شامل ہیں اور یہ کمیٹی ڈویڑنل اور صوبائی سطح پر بنائی گئی ہے، پولیس نے کمیٹی کی سفارشات پر سیکیورٹی دی اور واپس بھی لی ہے۔

اے ڈی خواجہ کا کہنا تھا کہ اگر کسی کو حقیقی خطرہ ہے اور ریاست کو اسے تحفظ فراہم کرنے کی ضرورت ہے اس کے علاوہ تھریٹ اسسمنٹ کمیٹی نے اس کی شفارس کی ہے تو اس شخص کو سکیورٹی دی گئی ہے باقی افراد سے سیکیورٹی واپس لے لی گئی ہے۔

آئی جی سندھ نے بتایا کہ ڈاکٹر فاروق ستار، خواجہ اظہار الحسن ، مصطفی کمال اور آفاق احمد کو مکمل سیکیورٹی فراہم کی گئی ہے جبکہ پیپلز پارٹی کے اراکین اسمبلی سے بھی سیکیورٹی واپس لے لی گئی ہے، چند اراکین اسمبلی سمیت شہریوں کو انٹرنیٹ کے ذریعے بھتے کے پیغامات ملے ہیں جس پر پولیس نے حساس اداروں سے مدد طلب کی ہے کال انٹرنیٹ کے ذریعے افغانستان اور ایران سے آئی ہیں تفتیش میں تمام زاویوں کو دیکھا جارہا ہے اور اس مسئلے کو جلد حل کرلیا جائے گا۔

اے ڈی خواجہ نے بتایا کہ سٹی کورٹ مال خانے میں آتشزدگی کی رپورٹس عدالت میں جمع کرادی گئی ہیں ڈی آئی جی ایسٹ اور ڈی آئی جی ساؤتھ کی سربراہی میں2 کمیٹیاں تشکیل دی گئی تھیں، ڈی آئی جی ایسٹ کی رپورٹ آگئی تھی کہ آتشزدگی کے باعث کتنی کیس پراپرٹیز کا نقصان ہوا وہ عدالت میں جمع کردی گئی ہے پنجاب فارنسک سائنس لیبارٹری کی رپورٹ بھی آگئی ہے جس میں منفی نوٹ لکھا گیا ہے۔

آئی جی سندھ نے بتایا کہ سٹی کورٹ مال خانے میں سی سی ٹی وی کیمرے نصب تھے اور پولیس نے ان کی ریکارڈنگ حاصل کرلی ہے جس سے ثابت ہوتا ہے کہ مال خانے کو کسی نے باہر سے آگ نہیں لگائی، آئی جی نے کہا کہ تمام سیاسی جماعتیں عام انتخابات کی طرف جارہی ہیں ان کی تمام سیاسی جماعتوں سے گزازش ہے کہ وہ جتنا نظم و ضبط کا مظاہرہ کریں گے انتخابات اتنے اچھے ماحول میں ہوںگے۔

اے ڈی خواجہ نے بتایا کہ رمضان المبارک میں سیکیورٹی کے خدشات بڑھ جاتے ہیں اور ماہ صیام کے آخری عشرے میں3 ہزار اہلکاروں کی مزید نفری تربیت مکمل کرکے کراچی پولیس میں شامل ہوجائے گی جس سے کراچی پولیس کی نفری میں اضافہ ہوجائے گا اور امید ہے اس بار کراچی پولیس رمضان المبارک میں سیکیورٹی کے بہتر اقدامات کرے گی۔

آئی جی سندھ نے بتایا کہ پنجاب کی فارنسک سائنس ایجنسی ایک بہت بڑا منصوبہ ہے، پنجاب نے4 سال قبل اسے ماڈل لائنز پر آگے بڑھایا اور اب ان کے پاس جدید سہولتیں موجود ہیں۔ سندھ پولیس کو اس قسم کی سہولتیں میسر نہیں لیکن سندھ پولیس نے اپنے وسائل میں رہتے ہوئے اور ڈونرز ایجنسیوں کی مدد سے بیلسٹک میچنگ تیار کی ہے جو اسٹیٹ آف آرٹ ہے جو پنجاب کے پاس بھی نہیں ہے۔

اے ڈی خواجہ نے کہا کہ گیس پروموٹوگراف اور دھماکا خیز مواد کی جانچ کے لیے لیب رواں ماہ کے آخر میں کام شروع کردے گی پنجاب پولیس کے پاس جدید اقسام کی فارنسک سہولیات موجود ہیں،اسی طرز پر سندھ حکومت نے بھی فارنسک سہولیات فراہم کرنے کا اعلان کیا ہے اس کے لیے ایک پروجیکٹ ڈائریکٹر مقررکردیا گیا ہے اور زمین الاٹ کردی گئی ہے۔

تقریب سے خطاب میں آئی جی سندھ نے کہا کہ کرمنل جسٹس سسٹم شہریوں کے بنیادی حقوق سے منسلک ہے20 سال پہلے محرم ، رمضان اور گرجا گھروں کی سکیورٹی اتنی ضروری نہیں تھی جتنی آج ہے پولیس کے لیے امن و امان قائم رکھنا اور تفتیش کو بہتر بنانا دونوں ہی ضروری ہیں بہتر تفتیش کے معاشرے پر اچھے اثرات مرتب ہوتے ہیں اب وقت آگیا ہے کہ تفتیش میں جدت لائی جائے تقریب میں ڈی آئی جی ٹریننگ شرجیل کھرل، محمد اکبر نے بھی خطاب کیا تقریب میں سندھ پولیس کے سینئر افسران اور رٹائرڈ افسران نے بھی شرکت کی۔