امریکی سفارتخانے کی منتقلی اسرائیلی تشدد کیخلاف قومی اسمبلی سینیٹ میں قرارداد منظور

قومی اسمبلی کااقوام متحدہ وعالمی برادری سے فلسطینیوں پراسرائیلی مظالم بندکرانے کے حوالے سے اقدامات اٹھانے کامطالبہ

Numainda Express May 16, 2018

اسرائیل فلسطین اوربھارت کشمیرمیں انسانی حقوق کی خلاف ورزیاں کررہا ہے، سفارتخانے کی منتقلی مسترد کرتے ہیں،سینیٹ قرارداد ۔ فوٹو:فائل

امریکی سفارتخانے کی مقبوضہ بیت المقدس منتقلی اوراسرائیل جانب سے فلسطینیوں پر تشدد کیخلاف پارلیمنٹ کے دونوں ایوانوں نے قرادادیں منظور کرلیں۔

قومی اسمبلی میں منگل کواسرائیلی فوج کی فلسطین کے نہتے شہریوں پر حالیہ فائرنگ اور اسرائیلی تشدد کیخلاف اپوزیشن کی قراردادکومتفقہ طور پر منظورکرلیاگیا۔ پاکستان کی قومی اسمبلی نے امریکی سفارتخانے کی القدس منتقلی کی سخت مذمت کرتے ہوئے اقوام متحدہ سمیت عالمی برادری سے مطالبہ کیاہے کہ نہتے فلسطینیوں پر اسرائیلی مظالم بند کرانے کے حوالے سے موثر اقدامات کیے جائیں۔

گزشتہ روزقومی اسمبلی میں وزیر مملکت برائے خزانہ راناافضل خان نے تحریک پیش کی کہ فلسطین کے حوالے سے قرارداد لانے کیلئے قاعدہ 88 کے تحت قواعد معطل کئے جائیں،قومی اسمبلی میں تحریک کواتفاق رائے سے منظورکرلیاگیا،بعدازاں پی ٹی آئی کی رہنماڈاکٹر شیریں مزاری نے فلسطین کے مظلوم عوام کے حق میں قرارداد پیش کی قراردادمیں کہاگیاہے کہ ایوان غزہ میں فلسطین کے نہتے شہریوں پر اسرائیلی مظالم' فلسطین پر اسرائیلی قبضے اور امریکا کی طرف سے اپناسفارتخانہ یروشلم منتقل کرنے کی سخت مذمت کرتاہے اور اقوام متحدہ سمیت عالمی برادری سے مطالبہ کرتاہے کہ اس صورتحال کانوٹس لیتے ہوئے موثر اقدامات اٹھائے جائیں اسرائیلی فوج کی حالیہ فائرنگ کے واقعہ پر گہری تشویش کااظہار کیاگیاہے۔

قومی اسمبلی نے قرارداد کی اتفاق رائے سے منظوری دے دی۔ دوسری جانب سینیٹ نے بھی اسرائیل کی مزمت اور فلسطینیوں کے حق میں قرارداد منظور کرتے ہوئے بین الاقوامی برادری سے اسرائیلی مظالم روکنے کیلیے کردار ادا کرنے کامطالبہ کردیا۔ بھارت مقبوضہ کشمیر اور اسرائیل فلسطین میں انسانی حقوق کی سنگین خلاف ورزیاں کررہا ہے۔ سینیٹ نے امریکاکے سفارتخانہ کی بیت المقدس منتقل کرنے کے فیصلہ کو مسترد کردیا۔ منگل کو سینٹ اجلاس میں قائد ایوان راجہ ظفرالحق نیاسرائیل کی طرف سے فلسطینیوں کے قتل عام پر سینیٹ میں قرارداد پیش کی جس کو متفقہ طور پر سینیٹ نے پاس کیا۔

قراردادمیں کہاگیاکہ سینٹ فلسطین کے عوام پر اسرائیل کی طرف سے انسانیت سوزمظالم جس کے نتیجے میں پچاس سے زائد فلسطینی شہید ہوئے جن میں بچے بھی شامل ہیں کہ شدید مذمت کر تی ہے۔ سوموار کواسرائیل کی طرف سے نہتے فلسطینیوں پر اسرائیل فوج نے فائرنگ کرکے ہزاروں کی تعداد میں فلسطینیوں کو زخمی کیا۔بھارت مقبوضہ کشمیر میں اور اسرائیل فلسطین میں انسانی حقوق کی سنگین خلاف ورزی کررہاہے ،قرارداد میں بین الاقوامی برداری سے مطالبہ کیاکہ وہ فلسطین اور کشمیر میں انسانی حقوق کی سنگین خلاف ورزیوں کانوٹس لے اور اس کو روکنے میں کردار اداکرے۔