شمالی امریکی ملک کی جیل میں قیدیوں کے درمیان خونی تصادم 18 ہلاک

تین روز میں دو جیلوں میں ہونے والے تصادم میں مجموعی طور 36 قیدی مارے گئے، فوٹو: فائل

---

براعظم شمالی امریکا کے ہسپانوی ملک ہنڈوراس کی ایک اور جیل میں خونی تصادم کے نتیجے میں 18 قیدی مارے گئے۔

بین الاقوامی خبر رساں ادارے کے مطابق ہنڈوراس کی ايک اور جيل ميں دوپہر کے کھانے کے دوران معمولی تلخی نے خونی تصادم کی شکل اختیار کرلی، چاقو، ڈنڈوں اور برتنوں کے آزادانہ استعمال کے باعث 18 قیدی مارے گئے جب کہ متعدد زخمی ہیں۔ قیدیوں نے جیل کے ایک حصے میں آگ بھی لگا دی۔

ہنڈوراس کے علاقے ايل پوروينيئر کی اس جیل میں خطرناک گینگ کے لیے کام کرنے والے مجرموں کو رکھا جاتا ہے اور یہاں سخت حفاظتی اقدامات اختیار کیے جاتے ہیں اس کے باوجود خونی تصادم ہوگیا جس پر قابو پانے کے لیے فوج کو طلب کرنا پڑا ہے۔

دو روز قبل ہنڈوراس کے ہی ایک اور شہر ٹيلا میں واقع ایک جیل میں بھی خطرناک قیدیوں کے درمیان جھگڑے میں 18 قیدی ہلاک اور 16 زخمی ہوگئے تھے۔ پولیس کا کہنا ہے کہ محض تین روز کے دوران دو جیلوں میں ہونے والے خونی تصادم میں 36 قیدیوں کی ہلاکت اور درجنوں کے زخمی ہونے کے واقعات میں کوئی تعلق نہیں ہے۔