راولپنڈی میں 6 سالہ بچی سے زیادتی کی کوشش کرنے والا معلم گرفتار

قاری رضوان بچی کو پارہ پڑھانے آیا اور کمرہ بند کر کے زیادتی کی کوشش کی، درخواست گزار والد (فوٹو : ایکسپریس)

---

صدر بیرونی پولیس نے کارروائی کرتے ہوئے 6 سالہ بچی سے زیادتی کی کوشش کرنے والے معلم کو گرفتار کرلیا۔

ایکسپریس نیوز کے مطابق بچی کے والد نے بتایا کہ قاری رضوان بچی کو قرآن شریف پڑھانے آیا اور کمرہ بند کر کے زیادتی کی کوشش کی، بچی کے شور مچانے پر والدہ نے دروازہ کھٹکھٹایا تو معلم قاری رضوان فرار ہوگیا۔

بعدازاں والد نے پولیس سے رجوع کیا اور ان کی درخواست پر صدر بیرونی پولیس نے فوری کارروائی کرتے ہوئے درندہ صفت معلم قاری رضوان کو گرفتار کرلیا۔



ایس ایچ او صدر بیرونی نے کہا ہے کہ ملزم کو ٹھوس شواہد کے ساتھ عدالت میں پیش کیا جائے گا تاکہ ملزم کو کڑی سے کڑی سزا دی جاسکے، راولپنڈی پولیس بچوں سے زیادتی کے معاملے پر زیرو ٹالیرنس پالیسی رکھتی ہے، ایسے ملزمان قانون کی گرفت سے نہیں بچ سکتے۔

ترجمان راولپنڈی پولیس کے مطابق سی پی او محمد احسن یونس نے کہا ہے کہ معصوم بچوں کے ساتھ زیادتی یا زیادتی کی کوشش ناقابل برداشت ہے، ملزم کو قرار واقعی سزا دلوانے کے لیے تمام قانونی تقاضے پورے کیے جائیں گے۔