آئی ایم ای آئی کی منظوری کے بغیر موبائل فونز بیچنے پر پابندی

سیلولر فونز کی تمام تکنیکی معلومات دینا ہونگی، فیصلہ سیکیورٹی خدشات پر کیا گیا، پی ٹی اے حکام فوٹو: فائل

---

پاکستان ٹیلی کمیونیکیشن اتھارٹی (پی ٹی اے) نے انٹرنیشنل موبائل ایکویپمنٹ آئی ڈینٹیٹی نمبر (آئی ایم ای آئی) کی منظوری کے بغیر موبائل فونز سیٹس کی فروخت پر پابندی عائد کردی ہے۔

اس ضمن میں حکام نے بتایا کہ پاکستان ٹیلی کمیونیکیشن اتھارٹی نے یہ فیصلہ سیکیورٹی خدشات کے باعث کیا ہے، اب تمام مینوفیکچررز اور امپورٹرزپر سیلولر موبائل فونز کی ٹائپ اورآئی ایم ای آئی نمبر کی پی ٹی اے سے منظوری لازمی قرار دیدی گئی ہے، مینوفیکچررز اور درآمد کنند گان اب پی ٹی اے کو سیلولرموبائل فونز کی تمام ٹیکنیکل تفصیلات فراہم کرنے کے پابند ہوں گے۔



ماضی میں ملک میں موبائل فونز کی فروخت میں اضافے کے لیے یہ شرط ختم کردی گئی تھی مگر گزشتہ چند سال سے غیرمعیاری اورکم قیمت والے موبائل فونز بغیر آئی ایم ای آئی نمبر یا پھر جعلی آئی ایم ای آئی نمبرکے حامل موبائل فونز استعمال ہو رہے ہیں۔