دودھ کی زائد مقدار گائے و بھینسوں کو لگائے جانیوالے ممنوعہ انجکشن ضبط

کوثر نیازی کالونی سے منشیات فروش جمیل گرفتار،شاہ ولی اللہ روڈ پر شہری کو لوٹ کر فرار ہونیوالے 2 اسٹریٹ کرمنل پکڑے گئے۔ فوٹو: فائل

---

سکھن پولیس نے چھاپہ مار کارروائی کے دوران ممنوعہ بوسٹن انجکشن کی سپلائی میں ملوث ملزم شاہد کو گرفتار کرلیا۔

پولیس نے 3 ٹرکوں کو اپنے قبضے میں لیکر بڑی تعداد میں بوسٹن انجکشن برآمد کرلیے جس کی مالیت کروڑوں روپے بتائی جاتی ہے۔ ممنوعہ انجکشن دودھ کی مقدار بڑھانے کے لیے گائے و بھینسوں کو لگائے جاتے ہیں۔

ایس ایچ او ناظم آباد راشد علی نے ملزم جمیل عرف جیلو کو گرفتار کر کے اعلیٰ کوالٹی کی ایک کلو چرس اور اسلحہ برآمد کرلیا ، انھوں نے بتایا کہ پولیس نے گزشتہ ماہ 27 نومبر کو کوثر نیازی کالونی اوڈھ محلہ میں منشیات فروش کی گرفتاری کے لیے چھاپہ مارا تھا جس میں ملزم جمیل عرف جیلو، اس کا بھائی اقبال اور بھتیجا آصف موقع سے فرار ہوگئے تھے تاہم پولیس نے موقع سے ایک ملزم اشرف کو گرفتار کرلیا تھا۔

فیڈرل بی صنعتی ایریا پولیس نے شاہ ولی اللہ روڈ پر شہری کو لوٹ کر فرار ہونے والے 2 اسٹریٹ کرمنلز عدنان اور احمد کو گرفتار کر کے علی نواز سے چھینی نقدی ، موبائل فون ، اسلحہ اور موٹر سائیکل برآمد کرلی۔