سندھ کابینہ میں شامل کیے گئے 4 نئے وزرا نے حلف اٹھالیا

سعید غنی محنت، انسانی وسائل اور اطلاعات کے وزیر ہونگے، 12 معاونین خصوصی بھی مقرر ۔ فوٹو : فائل

---

سندھ کابینہ میں شامل کیے جانے والے نئے وزراکی تقریب حلف برداری گزشتہ شام گورنر ہاؤس کے دربار ہال میں ہوئی جہاں گورنر سندھ عمرا ن اسماعیل نے صوبائی وزرا سے حلف لیا۔

گورنر سندھ عمران اسماعیل نے وزیر اعلیٰ سندھ سید مراد علی شاہ کی موجودگی میں چار نئے وزرا سے حلف لیا،نئے وزرا میں ساجد جوکھیو، گیان چند ایسرانی، ضیا عباس اور جام خان شورو شامل ہیں، چیف سیکریٹری نے وزیراعلیٰ سندھ کی سفارش پر نئے چار وزرا کی تقرری کا اعلان کیا۔

حلف لینے والے نئے وزرا کو گورنر سندھ نے مبارکباد پیش کرتے ہوئے کہا کہ حلف کی پاسداری مذہبی اور قومی فریضہ ہے، میں امید کرتا ہوں کہ سندھ کابینہ کے اراکین آئین کی بالا دستی، قانون کی حکمرانی اور گڈ گورنینس کے لیے خلوص نیت کے ساتھ اپنی تمام تر صلاحیتوں کو بروئے کار لائیں گے، تقریب میں اسپیکر سندھ اسمبلی آغا سراج دررانی، وزیر اعلی سندھ سید مراد علی شاہ، اراکین قومی و صوبائی اسمبلی، چیف سیکریٹری سندھ سید ممتاز علی شاہ سمیت دیگر بھی شریک تھے۔

سندھ کابینہ میں4نئے وزراکی شمولیت کے بعد پہلے سے موجود کئی وزراکے قلمدان بھی تبدیل کردیے،سندھ کابینہ میں تین نئے مشیر اور 12 معاونین خصوصی بھی شامل ہوگئے ہیں، سرکاری نوٹیفیکیشن کے مطابق اسماعیل راہو کو جامعات، تعلیمی بورڈز، ماحولیاتی تبدیلی اور ساحلی ترقی کا وزیر مقرر کیا گیا ہے، میر شبیر علی بجارانی مائن اینڈ منرل ڈولپمنٹ کے وزیر ہوں گے۔

مخدوم محبوب الزمان کے پاس بدستور ریونیوکی وزارت رہے گی، سعید غنی محنت،انسانی وسائل اور اطلاعات کے وزیر ہوں گے، سردار علی شاہ کے پاس ، تعلیم ،ثقافت ، سیاحت ، نوادارت اور آرکائیو کی وزارت ہوگی، مکیش کمار چاؤلہ ایکسائز ٹیکسیشن ، نارکوٹکس اور خواراک کے وزیر ہوں گے، تیمور تالپور کو جنگلات کی وزارت دی گئی ہے۔

ناصر حسین شاہ بلدیات، ہاؤسنگ ٹاؤن پلاننگ اور پبلک ہیلتھ انجیئرینگ کے وزیر ہوں گے،جام اکرام اللہ دھاریجو کے پاس صنعت و تجارت اینڈ کوآپریشن کی وزارت ہوگی، ساجد جوکھیو سماجی بہبود کے وزیر ہوںگے۔

گیان چند اسرانی کو اقلیتی امور کی وزارت دی گئی ہے،ضیا عباس شاہ ورکس اینڈ سروسز کے وزیر ہوں گے،جام خان شورو کو وزیر آبپاشی مقرر کیا گیا ہے۔

دریں اثناوزیر اعلیٰ سندھ کے 12 معاونین خصوصی کو بھی مقرر کئے گئے ہیں اور انہیں محکمے الاٹ کردئیے گئے۔بنگل خان مہر کو اینٹی کرپشن اور جنگلی حیات کے قلمدان سونپا گیا ہے۔

لیاقت آسکانی وزیراعلیٰ کے معاون خصوصی کچی آبادی ،ارباب لطف اللہ معاون خصوصی اسپورٹس ،ارسلان اسلام شیخ سکھر،سلمان عبداللہ مراد ملیر، آصف خان کیماڑی ، علی احمد جان ضلع غربی ،تنزیلہ قمبرانی انفارمیشن ٹیکنالوجی، قاسم نوید معاون خصوصی محکمہ سرمایہ کاری وقار مہدی معاون خصوصی سیاسی امور،سریندر ولاسائی معاون خصوصی انسانی حقوق، صادق علی میمن معاون خصوصی محکمہ خصوصی افراد،پارس ڈیرو معاون خصوصی امور نوجوانان مقررہوئی ہیں جبکہ پیپلزپارٹی رہنما صغیر احمد قریشی وزیر اعلی کے معاون خصوصی برائے حیدرآباد مقررکیا گیا ہے۔

سہیل انور سیال، ہری رام اور فراز ڈیرو سندھ کابینہ سے فارغ کردیا گیا جبکہ نثار کھوڑو بھی صوبائی مشیر کے عہدے سے فارغ نثار کھوڑو پیپلزپارٹی سندھ کے صدر ہیں۔

حکومت سندھ کا کہنا ہے کہ بیرسٹر مرتضی وہاب کو محکمہ قانون کا قلمدان رہے گا اور وہ بدستور سندھ حکومت کے ترجمان بھی ہوں گے، حکومت سندھ نے منظور وسان کو زراعت ، فیاض بٹ زکوۃ و عشر اور مذہبی امور، رسول بخش چانڈیو کو بحالی و ریلیف کا صوبائی مشیر مقرر کیا ہے۔