فخر زمان کو موقع دینے کیلیے رضوان کسی بھی بیٹنگ پوزیشن پر کھیلنے کیلیے تیار

میانداد کا چھپا رستم کہنا بڑا معنی رکھتا ہے، متحرک رہتا ہوں، وکٹ کیپر۔ فوٹو: اے ایف پی/ گیٹی امیجز

---

فخرزمان کو موقع دینے کیلیے محمد رضوان کسی بھی بیٹنگ پوزیشن پر کھیلنے کیلیے تیار ہیں.

کولمبو میں میڈیا سے گفتگو کرتے ہوئے وکٹ کیپر بیٹر نے کہا کہ فخر زمان آئی سی سی پلیئر آف منتھ رہ چکے، 3 یا 4 اننگز میں ناکامی سے کوئی فرق نہیں پڑتا،میں یہ باتیں سن رہا ہوں کہ وہ فارم میں نہیں ہیں،حالانکہ فخر مختلف انداز میں آؤٹ ہورہے ہیں، اگر ایک ہی طرح وکٹ گنواتے تو ہم فارم کی بات کرسکتے تھے، امید ہے کہ ہمیں اوپنرز تبدیل کرنے کی ضرورت نہیں پڑے گی،اگر مینجمنٹ ایسا کوئی فیصلہ کرتی ہے تو میں کسی بھی پوزیشن پر کھیلنے کیلیے تیار ہوں۔

یہ بھی پڑھیں: محمد رضوان نے فٹنس میں تمام قومی کرکٹرز کو پیچھے چھوڑ دیا

محمد رضوان نے کہا کہ ٹیم کو ورلڈ نمبر ون بنانے میں فاسٹ بولرز کا بڑا ہاتھ ہے۔ پیسرز تمام ٹیموں کیلیے مشکلات پیدا کر رہے ہیں، موسم ہمارے ہاتھ میں نہیں مگر بھارت سے میچ کی تیاری اور محنت کررہے ہیں۔

انھوں نے کہا کہ صرف بھارت اور پاکستان نہیں میں دنیا کے تمام کھلاڑیوں کی بات کر رہا ہوں، ہم جب بھی ملیں کارکردگی کی بات کرتے ہیں،گراؤنڈ میں ماحول مختلف ہوتا ہے۔

وکٹ کیپر بیٹر نے کہا کہ بھارت کیخلاف گذشتہ میچ میں ہدف اتنا آسان بھی نہیں تھا، جاوید میانداد کا مجھے چھپا رستم کہنا بڑا معنی رکھتا ہے، میں ایسی باتوں سے متحرک رہتا ہوں۔