مٹھی بھر خشک میوہ جات فالج کے خطرات کم کرسکتے ہیں

---

ایک نئی تحقیق میں معلوم ہوا ہے کہ صبح میں مٹھی بھر خشک میوہ جات کھانے سے دل کے دورے یا فالج کے خطرات میں کمی واقع ہوسکتی ہے۔

جرنل بائیو میڈ سینٹرل میڈیسن میں شائع ہونے والی ایک تحقیق میں محققین نے بتایا ہے کہ روزانہ صبح انڈہ کھانے کے بجائے 25 سے 28 گرام تک خشک میوہ جات کا کھایا جانا قلبی مرض میں مبتلا ہونے یا اس سے موت واقع ہونے کے خطرات کو 17 فی صد تک کم کردیتا ہے۔

کچھ ماہرین کا ماننا ہے کہ انڈوں میں موجود کولیسٹرول دل کی صحت کے لیے مضر ہوتا ہے۔ تاہم، دیگر ماہرین کا کہنا ہے کہ اس حوالے سے مزید شواہد کا سامنے آنا ضروری ہے۔ لیکن کم کولیسٹرول کے حامل خشک میوہ جات ان کو انڈوں کا بہترین متبادل بناتے ہیں۔

یہ نتائج جانوروں پر مبنی غذاؤں کے بجائے پودوں پر مبنی غذاؤں کے کھائے جانے کے قلبی مرض، ٹائپ 2 ذیا بیطس اور قبل از وقت موت واقع ہونے کے خطرات پر ممکنہ اثرات جاننے کے حوالے سے حاصل ہونے والے شواہد کا سائنسی ریویو لینے کی صورت میں سامنے آئے۔

تحقیق میں مچھلی یا سمندری غذا کو پودوں پر مبنی غذا سے بدلنے کے کوئی فوائد نہیں دیکھے گئے۔ جبکہ ان کو ڈیری اشیاء سے بدلنے سے بھی قلبی مرض میں خطرات میں کمی کےکوئی شواہد سامنے نہیں آئے۔

البتہ، ریویو میں پروسیسڈ گوشت کو دیگر غذاؤں سے بدلنے پر فوائد دیکھے گئے۔

وہ افراد جنہوں نے 50 گرام پروسیسڈ گوشت کے متبادل کے طور پر اس ہی مقدار میں دالوں، چنوں اور لوبیا کا استعمال کیا تھا ان کے قلبی مرض میں مبتلا ہونے یا اس سے موت واقع ہونے کے خطرات 23 فی صد تک کم تھے۔

دوسری جانب 50 گرام پروسیسڈ گوشت کے بدلے 28 سے 50 گرام خشک میوہ جات کھانے پر یہ خطرات 27 فی صد تک کم دیکھے گئے۔