دوررس نتائج کا حامل ٹیکس نظام متعارف کرارہے ہیں خرم دستگیر

ٹیکس سسٹم کا قبلہ درست کر دیا، اس میں موجود ہر طرح کی بے قاعدگی دور کرینگے، وزیرتجارت۔ فوٹو: فائل

---

وفاقی وزیر تجارت خرم دستگیر خان نے کہا ہے کہ ملک میں سہل، مستحکم اور دور رس نتائج کا حامل ٹیکس سسٹم متعارف کرائیں گے۔

ٹیکس سسٹم کا قبلہ درست کر دیا ہے، اس میں موجود ہر طرح کی بے قاعدگی دور کریں گے۔ حکومت کے پہلے سال ٹیکس اصلاحات کا آغاز کر دیا ہے۔ آئندہ سالوں میں اس عمل میں تیزی لائیں گے۔ ان خیالات کا اظہار وفاقی وزیر نے سسٹین ایبل ڈیولپمنٹ پالیسی انسٹیٹیوٹ(ایس ڈی پی آئی) کے زیر اہتمام بجٹ 2014میں ٹیکس ریفارم پر منعقدہ سیمنار سے خطاب کرتے ہوئے کیاجس میں متعدد سیاسی رہنمائوں اور معاشی ماہرین نے شرکت کی۔

وفاقی وزیر نے کہا کہ عوام کا ٹیکس انتظامیہ پر اعتماد بحال کر رہے ہیں جس سے ٹیکس کی ادائیگیوں میں اضافہ ہو گا۔ سرمایہ کاری اور تجارت کیلیے ٹیکس کا نظام ترغیبی اور تادیبی اصولوں پر استوار کرنے کیلیے کوشاں ہیں۔ انھوں نے کہا کہ موجودہ حکومت کیلیے ایک بڑا چیلنج غیر رسمی معیشت اور رجسٹرڈ سیکٹر کے درمیان فرق ختم کر کے زیادہ سے زیادہ لوگوں کو ٹیکس کے دائرے میں لانا ہے۔

وفاقی وزیر نے کہاکہ معاشی ترقی کی بنیاد توانائی کی فراوانی ہے جس کیلیے متعدد منصوبوں کا آغاز کر دیا گیا ہے جس میں کوئلے، پن بجلی اور نیو کلیئر توانائی کے منصوبے شامل ہیں۔ ان منصوبوں سے پیداوار کا آغاز ہوتے ہی ملک میں توانائی کا بحران ختم ہو جائے گا اور کاروباری سرگرمیوں کو فروغ ملے گا۔انھوں نے کہا کہ ملک کے ٹیکس سسٹم کا سرمایہ کاری سے براہ راست تعلق ہے۔

نئی سرمایہ کاری کے بغیر نیا روز گار ممکن نہیں۔ اچھے ٹیکس سسٹم کی بدولت غیر ملکی سرمایہ کاروں کا حکومت اور نظام پر اعتماد بڑھتا ہے جو سرمایہ کاری میں اضافے کا باعث بنتا ہے۔ وفاقی وزیر نے کہا کہ موجودہ حکومت کا مقصد ملک میں بڑی تعداد میںمعیاری روزگارکے مواقع پیدا کرنا ہے جس کیلیے صنعت، تجارت ،سروسز اور مینوفیکچرنگ کے تمام شعبوں میںسرمایہ کاری دوست اقدامات کیے جارہے ہیں۔