اسلام آباد:
جسٹس طارق جہانگیری ڈگری کیس میں بڑی پیش رفت سامنے آ گئی، جس کے مطابق ہائی کورٹ کا حکم نامہ چیلنج کردیا گیا ہے۔
ایکسپریس نیوز کے مطابق جسٹس طارق جہانگیری کی مبینہ جعلی ڈگری کے کیس میں اسلام آباد ہائی کورٹ کا حکم نامہ آئینی عدالت میں چیلنج کردیا گیا ہے۔ قبل ازیں جسٹس طارق جہانگیری کی جانب سے اس سلسلے میں 3 سینئر وکلا پر مشتمل قانونی ٹیم تشکیل دی گئی تھی۔
تفصیلات کے مطابق اکرم شیخ اور بیرسٹر صلاح الدین ہائیکورٹ میں جسٹس جہانگیری کیس کی پیروی کریں گے جب کہ ایڈووکیٹ عزیز بھنڈاری کے توسط سے آئینی عدالت میں ہائی کورٹ کا حکم نامہ چیلنج کیا گیا ہے، جس میں اسلام آباد ہائی کورٹ کے 9 دسمبر کے 2 رکنی بینچ کیخلاف اپیل دائر کی گئی ہے۔
آئینی عدالت میں دائر اپیل میں مؤقف اختیار کیا گیا ہے کہ اسلام آباد ہائی کورٹ میں دائر درخواست قابل سماعت نہیں۔ میرے خلاف اسلام آباد ہائی کورٹ میں دائر کی گئی رٹ کو خارج کیا جائے۔
درخواست میں مزید کہا گیا ہے کہ رٹ پٹیشن کو قابل سماعت قرار دینے سے قبل ان فریقین کو بھی سنا گیا جو فریق ہی نہیں تھے ۔ مجھے رٹ پٹیشن کو قابل سماعت قرار دینے سے قبل سنا ہی نہیں گیا۔ شواہد ریکارڈ کیے بغیر ایل ایل بی ڈگری کا معاملہ ہائیکورٹ نہیں دیکھ سکتی۔
مؤقف میں آئینی عدالت کو بتایا گیا ہے کہ ڈگری کی جانچ ٹرائل کورٹ شواہد ریکارڈ کرکے ہی کرسکتی ہے۔ اسلام آباد ہائی کورٹ شواہد ریکارڈ نہیں کر سکتی۔ عدالت سے استدعا کی گئی ہے کہ میرے خلاف اسلام آباد ہائی کورٹ میں دائر کی گئی رٹ کو خارج کیا جائے۔
