کبیر والا:
ایک ماہ سے لاپتا خاتون کی لاش اس کے اپنے ہی گھر سے برآمد ہوگئی۔ پولیس کے مطابق بہو نے بیٹے کے ساتھ مل کر اپنی ساس کو قتل کر کے گھر میں دفن کر دیا تھا۔
پولیس کے مطابق خاتون کی گمشدگی کی رپورٹ اس کے پوتے کی جانب سے درج کرائی گئی تھی جس میں کہا گیا تھا کہ اس کی دادی اچانک لاپتا ہو گئی ہے۔
تاہم پولیس نے تفتیش کا دائرہ وسیع کرتے ہوئے گمشدگی کے معاملے کی گہرائی سے تحقیقات کیں جس کے نتیجے میں قتل کا کیس سامنے آیا۔
پولیس کے مطابق خاتون کی بہو نے اپنے بیٹے کے ساتھ مل کر گلا دبا کر اپنی ساس کو قتل کیا تھا اور اس کی لاش گھر میں ہی دفن کردی تھی تاکہ کسی کو شک نہ ہو۔
پولیس نے گمشدگی کے معاملے کو قتل میں تبدیل ہوتے ہی دونوں ملزمان کو حراست میں لے لیا اور مزید تفتیش کا آغاز کر دیا ہے۔
پولیس کا کہنا ہے کہ یہ ایک انتہائی سنگین اور افسوسناک واقعہ ہے، جس میں خاندان کے افراد نے ہی بزرگ خاتون کو قتل کر کے اس کی لاش چھپائی۔
پولیس نے لاش کی برآمدگی کے بعد ملزمان کے خلاف مقدمہ درج کرکے مزید کارروائی شروع کردی ہے۔
