چترال:
لوئر چترال دروش ارندو کے علاقے ڈومیل میں ایک گھر پر برفانی تودہ گرنے کے نتیجے میں 9 افراد جاں بحق اور ایک بچہ شدید زخمی ہو گیا۔
ڈسٹرکٹ ایمرجنسی افسر ریسکیو 1122 لوئر چترال کے مطابق واقعے کی اطلاع ملتے ہی ریسکیو ٹیمیں مقامی افراد اور ڈسٹرکٹ انتظامیہ فوری طور پر موقعے پر پہنچ گئی۔
انہوں نے بتایا کہ حادثے میں جاں بحق ہونے والوں میں 4 خواتین اور 5 مرد شامل ہیں تاہم پاک آرمی فوج، ریسکیو 1122 اور مقامی افراد کی جانب امدادی کارروائی مکمل کر لی گئی ہے اور تمام لاشیں برف کے ملبے سے نکال لی گئی ہیں۔
ریسکیو حکام نے بتایا کہ شدید برف باری کے باعث ریسکیو آپریشن میں مشکلات کا سامنا رہا تاہم ٹیموں نے بروقت کارروائی کرتے ہوئے اپنی ذمہ داریاں احسن طریقے سے انجام دیں۔
ایمرجنسی افسر نے بتایا کہ زخمی بچے کو فوری طبی امداد فراہم کر کے قریبی اسپتال منتقل کر دیا گیا ہے جبکہ لاشیں ان کے آبائی علاقے دروش ورڈب پہنچا دی گئی ہیں۔
لواحقین کے دکھ میں برابر کے شریک ہیں، گورنر فیصل کریم کنڈی
گورنر خیبرپختونخوا فیصل کریم کنڈی نے چترال کے علاقہ ڈومیل میں گھر پر برفانی تودہ گرنے کے واقعے میں 9 افراد کے جاں بحق ہونے پرافسوس کا اظہار کیا۔
گورنر خیبرپختونخوا کی جاں بحق افراد کے لواحقین سے دلی ہمدردی و تعزیت کا اظہار کیا اور جاں بحق مرد و خواتین کے درجات بلندی کی دعا کی۔
فیصل کریم کنڈی نے کہا کہ واقعہ انتہائی افسوس ناک ہے اور لواحقین کے دکھ میں برابر کے شریک ہیں۔
وزیراعلیٰ کی امدادی کارروائیاں تیز کرنے کی ہدایت
وزیراعلیٰ خیبرپختونخوا محمد سہیل آفریدی نے لوئر چترال کے علاقہ ڈومیل میں برفانی تودہ گرنے کے واقعے پر متعلقہ حکام کو فوری ریسکیو اور امدادی کارروائیاں تیز کرنے کی ہدایت کردی۔
وزیراعلیٰ نے متاثرہ خاندانوں کو فوری ریلیف اور امدادی پیکیج فراہم کرنے اوربرف باری سے متاثرہ علاقوں میں سڑکوں کی بحالی کے لیے اضافی مشینری اورعملہ تعینات کرنے کی بھی ہدایت کی۔
سہیل آفریدی نے صوبائی ڈیزاسٹر مینجمنٹ اتھارٹی، ریسکیو 1122 اور ضلعی انتظامیہ کو الرٹ رہنے اور ہنگامی اقدامات یقینی بنانے کی ہدایت کردی۔
انہوں نے کہا کہ واقعہ انتہائی افسوس ناک ہے، جاں بحق افراد کے لواحقین سے دلی ہمدردی و تعزیت کرتے ہیں اور زخمیوں کو بہترین طبی سہولیات فرہم کی جائیں۔
