بھارت میں ٹیپو سلطان کا یوم پیدائش منانے پر ہندو انتہا پسندوں کے پرتشدد مظاہرے

ہندوانتہا پسندوں نے مسلمانوں کے جلوس پر حملہ کردیا جس کے نتیجے میں 50 سے زائد افراد زخمی ہوگئے۔ فوٹو: انڈین ایکسپریس

---

اٹھارویں صدی میں میسور کے حکمراں ٹیپو سلطان کا یوم پیدائش منانے پر ریاست کرناٹکا میں مظاہرے پھوٹ پڑے جب کہ کئی مقامات پر مسلمانوں اور ہندو انتہا پسندوں کے درمیان جھگڑا بھی ہوا۔

بھارتی میڈیا کے مطابق کانگریس کی ریاستی حکومت کی جانب سے ٹیپو سلطان کا یوم پیدائش منانے کا اعلان کیا گیا جس کے بعد سے ہی ہندو انتہا پسند تنظیموں کے غنڈے سرگرم ہوگئے اورجب ضلع کوڈاکو اور ٹمکر میں ٹیپو سلطان کی یاد میں جلوس نکالے گئے تو اس پر ہندو انتہا پسندوں نے حملہ کردیا جس کے نتیجے میں ایک شخص ہلاک اور 50 سے زائد افراد زخمی ہوگئے۔

دوسری جانب کرناٹک کے وزیراعلی سدھارامی کا کہنا ہے کہ ٹیپو سلطان انگریزوں کے خلاف عظیم تحریک کے سالار تھے جنہوں نے برطانوی راج کے خلاف کئی جنگیں لڑیں جب کہ بھارتیہ جنتا پارٹی اور راشٹریہ سیوک سنگھ کا رویہ متعصبانہ ہے۔