چین میں کوئلے کی کان میں آتشزدگی سے 21 مزدور جھلس کر ہلاک

اے ایف پی/ویب ڈیسک  ہفتہ 21 نومبر 2015
حادثے کے وقت کان میں 38 مزدور کام کررہے تھے جن میں سے 16 کو بحفاظت نکال لیا گیا، فوٹو: رائٹرز

حادثے کے وقت کان میں 38 مزدور کام کررہے تھے جن میں سے 16 کو بحفاظت نکال لیا گیا، فوٹو: رائٹرز

بیجنگ: چین کے صوبے ہیلونگ جیانگ میں کوئلے کی کان میں آگ لگنے سے 21 مزدور جھلس کر ہلاک ہوگئے۔

غیرملکی خبر ایجنسی کے مطابق حادثہ چین کے شمال مشرقی صوبے ہیلونگ جیانگ کے علاقے جیزی میں پیش آیا جہاں کوئلے کی ایک کان میں آگ بھڑک اٹھی جس نے دیکھتے ہی دیکھتے تیزی سے پھیلنا شروع کردیا، حادثے کے وقت کان میں 38 مزدور کام کررہے تھے جب کہ حادثے کے بعد فوری طور پر ریسکیو ٹیموں کو طلب کیا جنہوں نے 16 مزدوروں کو بحفاظت باہر نکال لیا ۔

مقامی میڈیا کا کہنا ہے کہ کان  میں 22  کان کن پھنس گئے تھے جن میں سے ریسکیو اہلکاروں نے 21 مزدوروں کی لاشیں نکال لیں جب کہ ایک مزدور اب بھی لاپتا ہے جس کی تلاش کا کام جاری ہے۔ حکام کا کہنا ہے کہ کان میں آگ لگنے کی وجوہات معلوم کرنے کے لیئے تحقیقات کی جارہی ہیں۔

واضح رہے کہ چین کوئلے کی پیداوار اور استعمال کے حوالے سے دنیا بھر میں پہلے نمبر پر ہے اور چینی کوئلے کی کانیں سب سے خطرناک سمجھی جاتی ہیں جہاں آئے روز حادثات رونما ہوتے رہتے ہیں۔ گزشتہ سال کوئلے کی کانوں میں حادثات کے تنیجے میں 931 کان کن اپنی جان سے ہاتھ دھو بیٹھے تھے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔