ادیدی راؤ فلم ’’ مرڈر 3‘‘ میں ’’روشنی‘‘ بن کر جلوہ گر ہونگی فن کی کوئی انتہا نہیں اداکارہ

ادتی راؤ حیدری رواں سال فلم ’’باس‘‘میں اکشے کمار کے ساتھ جلوہ گر ہوں گی۔ فوٹو : فائل

---

بالی وڈ اداکارہ ادیتی رائو حیدری کا کہنا ہے کہ نئی فلم ''مرڈر3'' میں''روشنی ''کے نام سے کردار نبھارہی ہوں اور اپنے کردار کی روشنی سے سچائی کا پہلو روشن کرنے کی کوشش کی ہے ۔

فلم کے مکالمے وشیش بھٹ اور مہیش بھٹ نے تحریر کیے ہیں میوزک پریتم نے ترتیب دیا ہے ۔فلم کی تشہیری مہم جاری ہے جس میں فنکاروں کی پوری ٹیم حصہ لے رہی ہے،ان کی شرکت نے پروموشنل تقریب کو چارچاند لگادیے۔نئی فلم 15 فروری کو سینمائوں کی زینت بنائی جائے گی۔ادیتی رائو حیدری نے کہا ہے کہ فلم میں صرف نام ہی ''روشنی ''نہیں کردار بھی کچھ ایسا ہی ہے جس میں پراسراریت سے جنم لینے والے اندھیروں کو ختم کرکے اجالوں کی نوید بھی دوں گی ۔

واضح رہے کہ اداکارہ رواں سال ہی آنیوالی فلم ''باس''میں اکشے کمار کے ساتھ جلوہ گرہونگی اداکارہ کا کہنا ہے کہ وہ ایک بارپھر اپنی پرفارمنس کی دھاک بٹھادیں گی ۔فلم ''لندن ،پیرس ،نیویارک ''میں علی ظفر کے ساتھ اپنی پرفامنس کی دھاک بٹھانے والی اداکارہ ادتی رائو اب اکشے کے ساتھ اپنی ادائوں کا جادو جگائیں گی۔بالی وڈ اداکارہ ادتی رائو حیدری کا کہنا ہے کہ اپنی الگ شناخت رکھتی ہوں میرے فنی سفرکا آغاز انتہائی اچھا ہوا ہے انھوں نے بتایا کہ رقص میں مہارت پر مجھے فلم میں کام کرنے کا مواقع ملے ہیں ،فن کی کوئی انتہا نہیں ہوتی اور سیکھنے کا عمل جاری رہتاہے۔

اداکارہ نے بتایاکہ رواں سال فلم ''رانجھناں'' ،''مرڈرٹو''او ''باس''میں نظر آئوں گی ۔ان فلموں میں اہم کردار نبھارہی ہوں ۔اداکارہ کا کہنا ہے کہ نئی فلم کی کہانی اچھی ہے اس پر محنت بھی کروں گی ۔شائقین کی رائے کا احترام کرتی ہوں۔ان کی خوشی کے لیے ہی پرفارم کرتی ہوں۔ اداکارہ ادتی رائو نے کہاکہ بالی وڈ میں نئے آنیوالوں کے لیے بہت اچھے مواقع ہیں اور فنکار کی صلاحیتوں کے یہاں پر ہی قدردان ملتے ہیں۔فلم کی کہانی کے تحت ہی خود کو تیار کرتی ہوں جو سین کی ڈیمانڈ ہوتی ہے وہی کرکے دکھانا ہی اصل فنکاری ہے۔



انھوں نے کہا کہ نئی فلموں میں کام کرنے کے لیے کہانی کو سب سے پہلے دیکھنا ضروری ہوتا ہے پھر اس میں اپنے کردار کو بھی مدنظر رکھنا پڑتا ہے۔دریں اثناء فلم ''باس ''کے ہدایتکار انتھونی ڈی سوزا نے بتایا ہے کہ اداکارہ ادتی رائو کو اس فلم کے لیے فائنل کرلیا ہے ۔انھوں نے کہا کہ ادتی رائو حیدری کی اچھی پرفارمنس نے متاثر کیا ہے اور اب اس فلم کی کاسٹ میں اس کا نام شامل ہوچکا ہے ۔انھوں نے کہا کہ ہمیں یقین ہے کہ ادتی اس فلم میں اپنی صلاحیتوں کا کھل کر اظہار کریں گی ۔انھوں نے کہا کہ اداکارہ نے پہلے بھی اچھا کام کیا اب بھی وہ مایوس نہیں کریں گی ۔

انتھونی ڈی سوزا کا کہنا ہے کہ اس فلم کی شوٹنگ کا آغاز دہلی سے کیا جائے گا ۔انھوں نے کہا کہ فلم کی شوٹنگ شیڈول کی بھی تفصیل بتائی جائے گی ۔اکشے کمار ہی فلم کے مرکزی کردار ہونگے ۔فلم کی شوٹنگ شیڈول کو فائنل کرلیا گیا ہے ،یہ فلم سال رواں کے وسط میں ریلیز کی جائے گی۔ انھوں نے کہا کہ اس فلم کو ملیالم فلم ''پوکری راجہ ''کاریمیک بھی کہا جاسکتا ہے یہ رومانوی میوزیکل فلم ہوگی ۔واضح رہے کہ 1979کو حیدرآباد میں پیداہونیوالی اداکارہ و ماڈل ادتی رائو کا تعلق شاہی خاندان سے ہے۔ آندھر پردیش کے مہاراجہ اکبر حیدری کی پوتی اور محمد صالح اکبر حیدری کی نواسی ہیں ،ان دونوں حضرات کا سلسلہ نسب رائل خاندان سے جاملتا ہے ۔محمد صالح اکبر بھارتی ریاست آسام کے گورنر بھی رہے ہیں۔ دادا اور نانا ایک ہی باپ کی اولاد ہیں دونوں مہاراجہ جے رامیش ور رائو کی اولاد ہیں۔

حیدر آباد میں اس خاندان کو بڑی عزت و احترام حاصل ہے ۔اداکارہ ادتی رائو حیدری نے کلاسیکل رقص کی تربیت 6سال کی عمر میں حاصل کرنے کا سلسلہ شروع کیا۔ اداکارہ کی ایک سابق بیوروکریٹ ستیدیپ مشرا سے شادی بھی ہوئی جس پر بعدازاں تنازع ہوگیا ۔ادتی رائو حیدری نے اداکاری کے شعبے میں 2006میں قدم رکھا ۔ان کی پہلی فلم تامل تھی ۔اس فلم میں ان کے رقص کو بے حد پسند کیا گیا ،جس پر انھیں3نیشنل فلم ایوارڈ بھی ملے۔ 2009میں ہندی فلم ''دہلی 6''میں معاون اداکارہ کا خوبی سے کردار نبھایا ۔2011 میں ادتی نے فلم ''یہ سالی زندگی ''میں پرفارم کرکے شائقین کے دل جیتے اور اس پر انھیں بہترین پرفارمنس پر اسکرین ایوارڈ سے نوازا گیا ۔اسی سال اداکارہ نے فلم ''راک اسٹار'' میں بھی جلوے دکھائے ۔

2مارچ 2012کو ریلیز ہونے والی ہدایتکار انو مینن کی فلم ''لندن، پیرس،نیویارک''میںلیڈنگ لیڈی رول کیا۔ اس فلم میں ادتی رائو حیدری نے علی ظفر کے مدمقابل ہیروئن کا کردار نبھایا ۔یہ فلم باکس آفس پر بھی کامیاب رہی اور اس میں ادتی کی پرفارمنس نے شائقین کو گرویدہ بنا لیا۔ادتی رائو حیدری کو اس کے بعد تین نئی فلموں میں پرفام کرنے کا موقع ملا جن میں دو فلمیں ریلیز کے لیے تیار ہیں جب کہ تیسری فلم کا حال ہی میں اعلان کیا گیا ہے ۔