برج خلیفہ نیوزی لینڈ کی وزیراعظم کی تصویر سے جگمگا اُٹھا

دبئی کے امیر راشد المکتوم نے نیوزی لینڈ کی وزیراعظم کا شکریہ ادا کیا۔ فوٹو : ٹویٹر

---

ISLAMABAD: متحدہ عرب امارات کے نائب صدر راشد المکتوم نے نیوزی لینڈ کی وزیراعظم جیسنڈا آرڈرن کو خراج تحسین پیش کرتے ہوئے کہا کہ آپ نے ڈیڑھ ارب مسلمانوں کے دل جیت لیے ہیں۔

متحدہ عرب امارات کے نائب صدر اور دبئی کے امیر محمد بن راشد المکتوم نے سماجی رابطے کی ویب سائٹ ٹویٹر پر اپنے ایک پیغام میں نیوزی لینڈ کی مساجد میں حملے کے بعد مسلمانوں سے غیر معمولی ہمدردی اور اظہار یکجہتی پر وزیراعظم جیسنڈا آرڈرن کا شکریہ ادا کیا۔

دبئی کے امیر شیخ محمد راشد المکتوم نے اپنی ٹویٹ میں مزید لکھا کہ نیوزی لینڈ کی وزیراعظم جیسنڈا آرڈرن نے اپنے ہمدردانہ رویے اور لواحقین کی دلجوئی کر کے پوری دنیا کے مسلمانوں کے دل جیت لیے ہیں۔

New Zealand today fell silent in honour of the mosque attacks' martyrs. Thank you PM @jacindaardern and New Zealand for your sincere empathy and support that has won the respect of 1.5 billion Muslims after the terrorist attack that shook the Muslim community around the world. pic.twitter.com/9LDvH0ybhD

— HH Sheikh Mohammed (@HHShkMohd) March 22, 2019

صرف یہی نہیں بلکہ متحدہ عرب امارات نے جسینڈا آرڈن کو خراج تحسین پیش کرنے کے لیے دبئی میں دنیا کی سب سے بلند عمارت برج خلیفہ کو نیوزی لینڈ کی وزیراعظم کی تصویر سے سجا دیا گیا، یہ منفرد اور دلکش منظر ہزاروں لوگوں نے دیکھا جس کی تصاویر سوشل میڈیا پر شیئر کی گئیں۔

واضح رہے کہ نیوزی لینڈ میں سفید فام دہشت گرد کی خود کار اسلحے سے مساجد پر حملے کے بعد وزیراعظم جیسنڈا آرڈرن نے لواحقین کے ساتھ دلی ہمدردی کا اظہار کیا اور مسلمانوں سے اظہار یکجہتی کے لیے پارلیمنٹ میں تلاوت کلام پاک کا اہتمام کیا جب کہ خطبہ جمعہ کے موقع پر خطاب کرتے ہوئے وزیراعظم نے حدیث نبوی صلی اللہ علیہ وآلہ وسلم سے آغاز کیا تھا۔