ایف آئی اے کی حراست میں میپکو کا لائن سپرنٹنڈنٹ جاں بحق

ایف آئی اے حکام نے واقعہ کی اعلی سطح تحقیقات کا حکم دے دیا (فوٹو : فائل)

---

ایف آئی اے ملتان کی حراست میں میپکو وہاڑی کا لائن سپرنٹنڈنٹ ضیا الحق جاں بحق ہوگیا، اہل خانہ نے ایف آئی اے پر تشدد کا الزام عائد کیا ہے۔

ایکسپریس نیوز کے مطابق ایف آئی اے ملتان کی ٹیم نے گزشتہ روز ضیا الحق سمیت 4 میپکو اہل کاروں کو کروڑوں روپے کا سامان خورد برد کرنے کے الزام میں گرفتارکیا۔ ضیا الحق اوراس کے دیگرساتھیوں کا 4 روزہ جسمانی ریمانڈ حاصل کرکے تفتیش کا سلسلہ جاری تھا۔

ڈپٹی ڈائریکٹر ایف آئی اے کے مطابق دوران تفتیش شام کو اچانک طبیعت خراب ہونے پر ضیا الحق کو ریسکیو کے ذریعے نشتر اسپتال لایا گیا لیکن وہ جانبر نہ ہوسکا۔



دوسری جانب ورثا نے ایف آئی اے اہل کاروں پر تشدد کا الزام عائد کیا ہے اور کہا ہے کہ تشدد کے سبب ضیا الحق کی جان گئی۔ ایف آئی اے حکام نے واقعہ کی اعلی سطح تحقیقات کا حکم دے دیا۔