وزیراعظم عمران خان نے الیکشن کمیشن کے نوٹس کا جواب جمع کرادیا

الیکشن کمیشن نے پی ٹی آئی میں انٹرا پارٹی انتخابات نہ ہونے پر پارٹی سربراہ عمران خان کو نوٹس جاری کیا تھا (فوٹو : فائل)

---

وزیراعظم عمران خان نے الیکشن کمیشن کی جانب سے پی ٹی آئی انٹرا پارٹی انتخابات کے حوالے سے دیے گئے شوکاز نوٹس کے جواب میں ایک سال کی مہلت مانگ لی۔

ایکسپریس نیوز کے مطابق پی ٹی آئی میں انٹرا پارٹی انتخابات نہ ہونے پر الیکشن کمیشن نے پارٹی سربراہ اور وزیراعظم عمران خان کو شوکاز نوٹس جاری کیا تھا جس کا عمران خان نے آج جواب جمع کرادیا۔

وزیراعظم نے کورونا وائرس کی وبا کو انتخابات میں تاخیر کا بڑا سبب قرار دیتے ہوئے الیکشن کمیشن سے ایک سال کی مہلت مانگ لی اور الیکشن کمیشن سے شوکاز نوٹس واپس لینے کی درخواست کی ہے۔

وزیراعظم نے اپنے جواب میں کہا ہے کہ ملک بھر میں کورونا وبا اور این سی او سی کی ہدایات کے مدنظر انٹرا پارٹی انتخابات نہیں کرائے جاسکے، این سی اوسی کی ہدایات کو مدنظر رکھتے ہوئے انٹراپارٹی انتخابات کا فیصلہ کیا جائے گا۔