انگریزی کی ایک مشہور کہاوت ہے، readers are leaders یعنی ’’مطالعہ کرنے والے رہنما ہوتے ہیں‘‘۔

اس کہاوت کی جڑیں اس خیال میں پیوست ہیں کہ جو لوگ بڑے پیمانے پر پڑھتے ہیں، وہ زندگی میں رہنمائی کرنے اور کامیاب ہونے کےلیے بہتر طریقے سے تیار ہوتے ہیں۔

پڑھنا ایک بنیادی مہارت ہے جو ہمارے علم کو وسعت دینے سے لے کر تنقیدی سوچ کی مہارتوں کو فروغ دینے تک کے امکانات کی دنیا کھولتی ہے۔

رے بریڈبری (Ray Bradbury) نے ایک بار کہا تھا ’’آپ کو کسی ثقافت کو تباہ کرنے کےلیے کتابیں جلانے کی ضرورت نہیں۔ بس لوگ کتابوں کو پڑھنا چھوڑ دیں، ثقافت خود بہ خود تباہ ہوگی‘‘۔ یہ دُور اندیشانہ بیان کم مطالعے کے نتائج کی پیش گوئی کرتا ہے۔ پڑھنا ہمیشہ سے عظیم رہنماؤں کی عادت رہی ہے۔ یہ ترقی، الہام اور نئے خیالات کے سب سے طاقتور ذرائع میں سے ایک ہے۔ پڑھنا آپ کی ذاتی ترقی میں ایک عظیم سرمایہ ہے۔

تاہم! پاکستان میں اکثر لوگوں کی پڑھنے کی صلاحیت کم ہوتی ہے۔ 2019 کی اینویل اسٹیٹس آف ایجوکیشن رپورٹ (ASER) کے مطابق، 6 سے 16 سال کی عمر کے صرف 49 فیصد بچے اردو یا اپنی علاقائی زبان میں کہانی پڑھ سکتے ہیں۔ یہ چونکا دینے والی رپورٹ پڑھنے کی مہارت میں ایک اہم خلا کی نشان دہی کرتی ہے، جس کے تعلیمی نتائج اور مستقبل کے مواقع پر شدید منفی اثرات مرتب ہوسکتے ہیں۔

اسی طرح 2019 میں کرائے گئے اَرلی گریڈ ریڈنگ اسسمنٹ (EGRA) کے مطابق دوسری جماعت کے 49 فیصد بچے سادہ انگریزی متن کا ایک لفظ بھی نہیں پڑھ سکتے۔ یہ اعداد و شمار پاکستان میں بچوں اور بڑوں میں پڑھنے کی صلاحیتوں کو بہتر بنانے کی اشد ضرورت کو ظاہر کرتے ہیں۔

پڑھنے کی مہارت کو کئی طریقوں سے بہتر بنانا ممکن ہے۔ ذیل میں کچھ سرگرمیوں کی ہدایات دی گئی ہیں، جنھیں آپ اپنے پڑھنے کی مہارت کو بہتر بنانے کےلیے استعمال کرسکتے ہیں۔

پڑھے ہوئے مواد کا خلاصہ پیش کرنا

آپ نے جو پڑھا ہے اس کے بارے میں اپنے علم میں اضافہ کرنے اور پڑھنے کی مہارت کو بہتر بنانے کا ایک مؤثر طریقہ خلاصہ لکھنا ہے۔ خلاصہ لکھتے وقت یہ پیشِ نظر رکھیے کہ متن میں کیا اہم ہے اور پھر اسے اپنے الفاظ میں بیان کیجیے۔ خلاصہ آپ کو اس بات کا تعین کرنے میں مدد دیتا ہے کہ آیا آپ نے جو کچھ پڑھا ہے اسے آپ واقعی سمجھتے ہیں اور اسے طویل مدت تک بہتر طور پر یاد رکھ سکتے ہیں۔ نیز کسی بھی متن کی مخصوص تفصیلات، مرکزی عنوانات اور معلومات کا اپنے کسی دوست سے اشتراک کرنا یا خلاصہ لکھنا اسے بہتر طریقے سے سمجھنے اور اپنے ذہن میں برقرار رکھنے میں معاون ہوگا۔

پڑھتے وقت اہم نکات قلم بند کرنا

پڑھنے کے دوران اہم نکات لکھنا آپ کے پڑھنے کی مہارت کو بہتر بنانے کا ایک اور انتہائی مؤثر طریقہ ہے۔ آپ افسانوی ادب یا سائنس جرنل یا کوئی اور تاریخی کتاب پڑھتے ہوئے نئے الفاظ یا اپنے تأثرات لکھ سکتے ہیں۔ آپ جو کچھ پڑھتے ہیں اس کے بارے میں سوالات پوچھ سکتے ہیں اور جب آپ مؤثر انداز میں اہم نکات قلم بند کرلیتے ہیں تو سوالات، اپنی تفہیم اور متن کو اچھے انداز میں جوڑ سکتے ہیں۔ اسی طرح چارٹ، جدول، ڈائیگرام، گراف بنانا اور موضوعات کے ذریعے خیالات کو واضح کرسکتے ہیں جو کہ آپ کو متن سے نتائج اخذ کرنے میں مدد کریں گے۔

پڑھنے کی کلیدی حکمت عملی استعمال کرنا

جب آپ مختلف عبارتیں پڑھتے ہیں تو آپ کئی کلیدی حکمت عملیوں کو اپنا کر اپنی سمجھ کو بڑھا سکتے ہیں۔ اگر آپ کسی متن کا جائزہ لیتے ہیں تو آپ اس کی ساخت کو معلوماتی، تحقیقی، ہدایتی یا تدریسی ساخت کے طور پر پہچان سکتے ہیں۔ آپ مختلف متن کی اہم خصوصیات مثلاً مرکزی موضوعات، مسائل اور ان کا حل یا تقابلی نظریات کی بھی شناخت کرسکتے ہیں۔ اس ضمن میں آپ متن کی خصوصیات کی نشان دہی کرکے، مختلف امور کے مقاصد کا تعین کرکے، اور نوٹس لے کر اپنے پڑھنے کی مہارت کو بہتر بناسکتے ہیں۔

مقصد کا تعین کرنا

مختلف عبارتوں کو پڑھتے ہی ان کے مقصد کا تعین کرنے کی مشق کیجیے۔ تھوڑا سا غور کیجیے کہ مختلف تحریریں کیوں لکھی گئیں اور ان سے کیا نکات، مرکزی خیال یا مزید موضوعات اخذ کیے جاسکتے ہیں۔ اس کے علاوہ آپ پڑھنے کے مقصد مثلاً معلومات تلاش کرنا، دی گئی ہدایات پر عمل کرنا، یا کہانی سے لطف اندوز ہونے کی شناخت کرسکتے ہیں۔ جب آپ کو معلوم ہوگا کہ آپ وہ متن کیوں پڑھ رہے ہیں تو آپ اُس متن سے کلیدی خیالات اور تفصیلات تلاش کرسکتے ہیں جو اس مقصد کی تکمیل میں مددگار ہیں۔

متن کے ذیلی عنوانات کو پہلے سے پڑھنا

پڑھنے کی مہارت کو بہتر بنانے کا ایک اور طریقہ یہ ہے کہ متن کا جائزہ لیجیے اور سرسری مطالعہ کیجیے۔ اس حکمت عملی کا استعمال کرتے ہوئے، آپ عنوانات، ذیلی عنوانات، موضوعاتی سطور اور دیگر متن کی خصوصیات کا جائزہ لے سکتے ہیں تاکہ یہ اندازہ لگایا جاسکے کہ آگے آپ کیا پڑھیں گے۔ پیشگی عنوانات پڑھنا آپ کو اُس متن کے پسِ پردہ بنیادی خیالات کو تشکیل دینے میں مدد دے سکتا ہے۔

پڑھنے کےلیے اہداف مقرر کرنا

اپنے لیے پڑھنے کے اہداف کا تعین کرنا ممکن اور ضروری ہے تاکہ وسیع ذخیرۂ الفاظ تیار کیا جاسکے، مختلف متون کی گہرائی سے سمجھ حاصل کی جاسکے اور جو کچھ آپ پڑھتے ہیں، اسے اپنے نقطۂ نظر سے جوڑنے کی اپنی صلاحیت کو بہتر بناسکیں۔ اگر آپ طب، ریاضی، معاشیات، ٹیکنالوجی یا کسی دوسرے مضمون میں دلچسپی رکھتے ہیں تو آپ اس موضوع سے متعلق مختلف الفاظ کو سیکھنے کا ہدف مقرر کرسکتے ہیں۔ جیسے جیسے آپ پڑھتے جائیں، آپ غیر مانوس الفاظ کے معنی دریافت کرسکتے ہیں جو آپ کے ذخیرۂ الفاظ کو وسیع کرنے میں مددگار ثابت ہوں گے۔

ہر روز پڑھنے کےلیے وقت نکالنا

بلاناغہ پڑھنے کی مشق اور عادت آپ کی صلاحیتوں کو نکھارنے کے بہترین طریقوں میں سے ایک ہے۔ یہ مشق بالآخر آپ کو پڑھنے کی مہارت کو فروغ دینے میں مدد کرے گی اور آپ ہر روز پڑھنے کےلیے 10 سے 15 منٹ مختص کرسکتے ہیں۔ اگر آپ اپنے پڑھنے کی مہارت بہتر بنانے کےلیے روزانہ وقت نکالیں تو آپ اخبار کے مضامین، افسانے، میگزین کی اشاعتیں، یا کسی اور قسم کے پیچیدہ متن کو پڑھ کر آسانی سے سمجھ سکتے ہیں۔

اپنے ذخیرۂ الفاظ کو بہتر بنانا

مختلف الفاظ کا مطلب جاننا متن کے مفہوم کو سمجھنے میں آپ کی صلاحیت کو بہتر بناسکتا ہے۔ اپنے الفاظ کے ذخیرے کو بہتر بنانے کےلیے آپ درج ذیل کام کرسکتے ہیں:

الفاظ کی سمجھ کی اپنی موجودہ سطح کا اندازہ لگانے کےلیے کسی آن لائن الفاظ کا کوئز لیجیے۔

آپ ہفتے میں ایک یا دو بار فلیش کارڈز کے ذریعے ایسے الفاظ پر اپنے آپ کو جانچنے کی کوشش کیجیے جن کا مطلب آپ نہیں جانتے۔

زبانی اور تحریری بات چیت میں نئے سیکھے ہوئے الفاظ استعمال کرنے کی مشق کیجیے۔

کسی مخصوص سیاق و سباق میں کسی لفظ کے مطلب کا اندازہ لگانے کی اپنی صلاحیت کو بہتر بنانے کےلیے زیادہ سے زیادہ پڑھنے کی عادت اپنائیے۔

جب بھی آپ کوئی کتاب یا عبارت پڑھیں تو غیر مانوس الفاظ کی فہرست بنائیے اور لغت سے ان کے معنی تلاش کیجیے۔

متن کے بارے میں سوالات کے ساتھ پڑھنا

آپ جو متن پڑھ رہے ہیں اس کے بارے میں سوالات پوچھنا آپ کے پڑھنے کی سمجھ کو بہتر بنانے میں مدد کرسکتا ہے۔ یہ آپ کو موضوعات، گراف، اشکال، تصاویر، ڈائیگرام اور متن کے دوسرے اجزا کو دریافت کرنے کے قابل بناکر آپ کی مجموعی سمجھ کو بھی وسیع کرسکتا ہے جن کے بارے میں آپ بہ صورت ِدیگر شاید تفصیل اور باریکی سے جاننے کی کوشش نہ کریں۔ کوئی بھی متن پڑھتے ہوئے آپ اپنے آپ سے درج ذیل سوالات پوچھ سکتے ہیں:

مصنف نے کتاب کا آغاز اسی مقام سے کیوں کیا؟

کتاب کے مختلف کرداروں میں کس قسم کا تعلق ہے؟

پڑھتے وقت آپ اُس وقت تک کے مرکزی کردار کے بارے میں کیا جانتے ہیں؟

کیا کوئی ایسے موضوعات ہیں جو پوری کتاب میں تسلسل کے ساتھ سامنے آئے ہیں؟ اگر ایسا ہے تو ان کا کیا مطلب ہے؟

آپ کے سوالات جتنے زیادہ مخصوص ہوں گے متن اور اس کے معنی میں مزید بصیرت حاصل کرنے کے اتنے ہی زیادہ امکانات ہوں گے۔

سیاق و سباق کے اشارے استعمال کرنا

سیاق و سباق کے اشارے کا استعمال یہ سمجھنے کا ایک بہترین طریقہ ہے کہ آپ کیا پڑھ رہے ہیں، یہاں تک کہ اگر آپ کو استعمال ہونے والے تمام الفاظ کا علم نہ بھی ہو۔ سیاق و سباق کے اشارے کچھ مخصوص الفاظ (جن سے آپ واقف نہیں) کے اردگرد کے الفاظ اور جملوں کی صورت میں مل سکتے ہیں۔ سیاق و سباق کے اشارے استعمال کرنے کےلیے آپ جملے کے کلیدی ٹکڑوں یا خیالات پر توجہ مرکوز کرسکتے ہیں اور اُن معلومات کی بنیاد پر کسی جملے یا پیراگراف کے مرکزی خیال کو اخذ کرسکتے ہیں۔ آپ ایسے الفاظ کو بھی تلاش کرسکتے ہیں جو کسی مخصوص لفظ کے مترادف یا متضاد ہیں، جن کا مطلب پہلے سے آپ کو معلوم نہیں تھا۔

مرکزی خیال تلاش کرنا

کسی پیراگراف یا مضمون کے مرکزی خیال کی نشان دہی کرنے سے آپ کو مضمون کی اہمیت کا تعین کرنے میں مدد مل سکتی ہے۔ یہ سمجھنا کہ آپ جو کچھ پڑھ رہے ہیں وہ کیوں ضروری ہے، اس سے آپ کو یہ جاننے میں مدد مل سکتی ہے کہ مصنف کیا بیان کرنے کی کوشش کر رہا ہے۔ پڑھتے وقت ہر چند پیراگراف کے بعد رکیے اور دیکھیے کہ کیا آپ اُس متن کے مرکزی خیال کو سمجھ سکے ہیں۔ اس کے بعد مزید سمجھنے کےلیے مرکزی خیال کو اپنے الفاظ میں ڈھالنے کی کوشش کیجیے۔

پڑھنے کے مواد کو چھوٹے چھوٹے حصوں میں تقسیم کرنا

اگر آپ طویل یا زیادہ مشکل متن پڑھ رہے ہیں تو اسے چھوٹے چھوٹے حصوں میں تقسیم کرنے پر غور کیجیے۔ مثلاً آپ ایک وقت میں دو پیراگراف پڑھیے اور پھر جو کچھ آپ نے پڑھا ہے اس کا فوری خلاصہ کرنے کےلیے رکیے۔ متن کو یوں چھوٹے حصوں میں تقسیم کرکے پڑھنا آپ کو زیادہ پرجوش انداز میں مگر بغیر تفہیم کے پڑھنے کے بہ جائے کم مغلوب ہونے میں مدد دے سکتا ہے اور آپ کو متن میں موجود معلومات کو صحیح معنوں میں سمجھنے کا ایک بہتر موقع فراہم کرسکتا ہے۔

روانی سے پڑھنے کا جائزہ لینا

پڑھنے میں اپنی روانی کا جائزہ لینا بھی آپ کے پڑھنے کی فہم کی مہارتوں پر کام کرنے کا ایک مؤثر طریقہ ہے، جس سے آپ اپنے پڑھنے کی مشق اور عادات کےلیے حقیقت پسندانہ اہداف طے کرسکتے ہیں۔ یہ خاص طور پر ان کتابوں یا تحاریر کےلیے درست ہے جو آپ کو مشکل لگتی ہیں۔ روزانہ کی بنیاد پر پڑھنے کےلیے اپنے لیے ایک ایسے مقصد کا تعین کیجیے جسے آپ باآسانی حاصل کرسکتے ہیں۔ مثلاً یہ کہنے کے بجائے کہ آپ دو دن میں ایک پوری کتاب پڑھ سکتے ہیں، یہ عہد کیجیے کہ آپ ایک رات میں اس کتاب کے صرف تین ابواب پڑھیں گے۔ یہ آپ کو اپنے اہداف تک پہنچنے میں مدد دے گا اور ہر نشست کے درمیان آپ جو کچھ پڑھ رہے ہیں، اس کا جائزہ لینے کےلیے آپ کو مناسب وقت بھی فراہم کرے گا۔

مطالعہ کرنے والے واقعی رہنما ہیں۔ پڑھنا ایک اہم ہنر ہے جو علم میں توسیع، تنقیدی سوچ کی مہارتوں کو فروغ دینے اور زبان کی مہارت کو بہتر بنانے سمیت متعدد فوائد فراہم کرتا ہے۔ تاہم! پاکستان میں افراد، خاص طور پر بچوں میں پڑھنے کی صلاحیتوں میں نمایاں فرق ہے۔ اس مسئلے کو حل کرنے کےلیے، ہمیں پڑھنے کے کلچر کو فروغ دینے، کتابوں اور ڈیجیٹل وسائل تک رسائی بڑھانے، لطف اٹھانے کےلیے پڑھنے کی حوصلہ افزائی اور اساتذہ کےلیے تربیت فراہم کرنے کی ضرورت ہے۔ ایسا کرنے سے ہم پاکستان میں افراد کی پڑھنے کی صلاحیتوں کو بہتر بنانے اور انھیں کامیابی کے راستے پر گامزن کرنے میں مدد کرسکتے ہیں۔

نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 800 سے 1,200 الفاظ پر مشتمل تحریر اپنی تصویر، مکمل نام، فون نمبر، فیس بک اور ٹوئٹر آئی ڈیز اور اپنے مختصر مگر جامع تعارف کے ساتھ [email protected] پر ای میل کردیجیے۔